ساہیوال میں سی ٹی ڈی پنجاب کی کارروائی، کالعدم ٹی ٹی پی کا دہشت گرد گرفتار

لاہور (بیورو رپورٹ) صوبہ پنجاب کے ضلع ساہیوال کے نواحی گاؤں 96 سکس آر میں نیاز چوک کے قریب سی ٹی ڈی نے کارروائی کر کے کالعدم تنظیم کا دہشت گرد گرفتار کر لیا۔

سی ٹی ڈی پنجاب نے ساہیوال میں کارروائی کرتے ہوئے کالعدم تنظیم تحریک طالبان پاکستان کے دہشت گرد عزیز اللہ خان خٹک کو گرفتار کرلیا۔

قبضہ سے دھماکہ خیز مواد، جزوی تیار شدہ ایک آئی ای ڈی ، آہنی ڈبہ، 2 ہزار 42 گرام دھماکہ خیز مواد وغیرہ برآمد کر لیا،دہشت گرد عزیز اللہ خاں خٹک کا تعلق ضلع کرک سے ہے۔

سی ٹی ڈی حکام کے مطابق دہشتگرد کیخلاف تھانہ سی ٹی ڈی ساہیوال میں مقدمہ درج کرلیا گیا جس میں ایکسپلوزیو ایکٹ اور انسدا د دہشت گردی ایکٹ کی دفعات شامل کی گئی ہیں۔

گرفتار کیے گئے دہشت گرد سے مزید تفتیش بھی کی جائے گی۔