شمالی وزیرستان میں عسکریت پسندوں نے سرکاری سکول بارودی مواد سے اُڑا دیا

میرانشاہ (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان کی تحصیل میرعلی میں گزشتہ شب عسکریت پسندوں نے ایک سرکاری پرائمری سکول کو بارودی مواد سے تباہ کر دیا، جس کے نتیجے میں عمارت کا بڑا حصہ منہدم ہوگیا۔

مقامی ذرائع کے مطابق گاؤں خوشحالی میں واقع گورنمنٹ پرائمری اسکول آیاز کوٹ کو عسکریت پسندوں نے بارودی مواد نصب کر کے نشانہ بنایا۔ دھماکہ انتہائی شدید تھا، جس کی آواز دور دور تک سنی گئی، جبکہ عمارت کا بڑا حصہ مکمل طور پر تباہ ہو گیا۔

اس اسکول میں 600 سے زائد بچے تعلیم حاصل کر رہے تھے۔ عمارت تباہ ہونے کے بعد علاقے میں خوف و ہراس کی فضا قائم ہے اور والدین اپنے بچوں کے تعلیمی مستقبل کے حوالے سے شدید پریشانی میں مبتلا ہیں۔

مقامی مکینوں کا کہنا ہے کہ تعلیمی اداروں پر حملے نہ صرف تعلیمی سرگرمیوں کو بری طرح متاثر کر رہے ہیں بلکہ امن و امان کی مجموعی صورتحال پر بھی سنگین منفی اثرات ڈال رہے ہیں۔

ابتدائی اطلاعات کے مطابق واقعے کی ذمہ داری تاحال کسی گروہ یا تنظیم نے قبول نہیں کی ہے۔