لکی مروت میں طالبان نے لڑکیوں کے اسکول کو دھماکہ خیز مواد سے اڑا دیا

لکی مروت (ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں شدت پسندوں نے ایک لڑکیوں کے پرائمری اسکول میں دھماکہ خیز مواد نصب کر دیا، جس کے نتیجے میں اسکول کی عمارت کو جزوی نقصان پہنچا، تاہم خوش قسمتی سے کسی کے ہلاک یا زخمی ہونے کی اطلاع نہیں ملی۔

ڈسٹرکٹ پولیس آفیسر نذیر خان کے مطابق یہ واقعہ ہفتہ کی رات وانڈا زاہد گل کے علاقے میں پیش آیا، جو تھانہ ڈڈیوالہ کی حدود میں آتا ہے۔ ابتدائی تحقیقات میں معلوم ہوا کہ اسکول میں نصب دو آئی ای ڈیز میں سے ایک پھٹ گیا جبکہ دوسرا پولیس کے پہنچنے پر ناکارہ بنا دیا گیا۔

ڈی پی او نے بتایا کہ علاقے میں پولیس کی بھاری نفری تعینات کر دی گئی ہے اور ملزمان کی تلاش کے لیے ضلع میں سرچ آپریشن جاری ہے۔

لکی مروت میں گزشتہ برسوں میں دہشت گردی کی سرگرمیوں میں اضافہ ہوا ہے۔ اسی ماہ کے اوائل میں حملوں کے دوران 3 فوجی جوان اور ایک خاتون ہلاک جبکہ 3 دیگر زخمی ہوئے تھے۔ 13 اگست کو دہشت گردوں نے ضلع میں گیس پائپ لائن کو دھماکے سے اڑا کر پنجاب کو گیس سپلائی معطل کر دی تھی۔