ڈیرہ اسماعیل خان میں سیکیورٹی فورسز کے کانوائے کے قریب دھماکا، 5 اہلکار زخمی

اسلام آباد (نمائندہ ڈیلی اردو) صوبہ خیبر پختونخوا کے ضلع ڈیرہ اسماعیل خان کی تحصیل کلاچی کے علاقے میں سیکیورٹی فورسز کے قافلے کے قریب دھماکے میں پانچ فوجی زخمی ہوگئے ہیں۔

یہ واقعہ منگل کی صبح سات اور ساڑھے سات بجے کے درمیان پیش آیا۔

پولیس اہلکاروں نے بتایا ہے کہ سکیورٹی فورسز کا ایک قافلہ جنوبی وزیرستان جا رہا تھا کہ آبادی سے کوئی پانچ کلومیٹر دور ہتھالہ روڈ پر زور دار دھماکہ ہوا۔

اس دھماکے میں پانچ اہلکار زخمی ہوئے ہیں جنھیں فوجی ہسپتال سی ایم ایچ منتقل کر دیا گیا ہے۔

زخمیوں ہونے والوں میں لانس نائک احسان، سپاہی احمد علی، نائب صوبیدار فضل بیٹنی، لانس نائک عارف طوری اور لانس نائک سلمان یوسفزئی شامل ہیں۔

پولیس کے مطابق سکیورٹی فورسز نے علاقے کو فوری طور پر گھیرے میں لے کر تفتیش شروع کر دی ہے۔

مقامی لوگوں نے بتایا کہ اس واقعے کے بعد پولیس بھی موقع پر پہنچ گئی تھی لیکن انھیں اس واقعے کے مقام تک رسائی نہیں دی گئی۔