آبنائے ہرمز میں جہاز کو نامعلوم پروجیکٹائل سے نقصان، عملہ محفوظ

تہران(ڈیلی اردو) برطانوی میری ٹائم ٹریڈ آپریشنز نے بتایا ہے کہ آبنائے ہرمز میں ایک بحری جہاز کو نامعلوم پروجیکٹائل سے نشانہ بنایا گیا، جس کے نتیجے میں جہاز کے انجن روم کو نقصان پہنچا۔

برطانوی ادارے کے ابتدائی بیان کے مطابق واقعے میں استعمال ہونے والے پروجیکٹائل کی نوعیت اور حملے کے ذمہ داروں کے بارے میں فوری طور پر کوئی معلومات سامنے نہیں آئی ہیں۔ جہاز پر موجود تمام عملہ محفوظ رہا۔

ادارے نے واقعے سے متعلق مزید تفصیلات فراہم نہیں کیں اور یہ بھی واضح نہیں کیا گیا کہ متاثرہ جہاز کس ملک کے پرچم تلے سفر کر رہا تھا یا وہ تیل بردار جہاز تھا یا مائع قدرتی گیس لے جانے والا ٹینکر۔

آبنائے ہرمز میں حالیہ عرصے کے دوران بحری آمدورفت کو متعدد سیکیورٹی واقعات کا سامنا رہا ہے، جس کے باعث عالمی سطح پر اس اہم بحری گزرگاہ سے متعلق تشویش میں اضافہ ہوا ہے۔

ایران اور امریکہ کے درمیان جاری کشیدگی کے تناظر میں آبنائے ہرمز کی صورتحال خاص اہمیت رکھتی ہے، کیونکہ یہ عالمی توانائی کی ترسیل کے لیے اہم ترین بحری راستوں میں شمار ہوتی ہے۔

برطانوی میری ٹائم حکام کی جانب سے تازہ واقعے کی مزید تحقیقات جاری ہیں جبکہ حملے کی ذمہ داری تاحال کسی فریق نے قبول نہیں کی۔