یمن میں حوثی باغیوں کے میزائل اور ڈرون حملے، 36 فوجی اہلکار ہلاک

عدن (ڈیلی اردو) یمن کے وسطی علاقوں میں ایران کے حمایت یافتہ حوثی باغیوں کے میزائل اور ڈرون حملوں میں کم از کم 36 فوجی اہلکار ہلاک ہوگئے۔

ذرائع کے مطابق حملے صوبہ مأرب کے علاقے الرویک اور صوبہ حضرموت کے علاقے العبر میں ایمرجنسی فورسز کے زیرِ انتظام متعدد فوجی کیمپوں پر کیے گئے۔

یمن کے وزیرِ صحت قاسم بحیبہ نے حملوں کی شدید مذمت کرتے ہوئے انہیں "عیارانہ" قرار دیا اور کہا کہ ان کا مقصد ملک کے امن و استحکام کو نقصان پہنچانا تھا، تاہم انہوں نے ہلاکتوں کی تعداد کی تصدیق نہیں کی۔

دوسری جانب حوثی باغیوں کے ترجمان نے دعویٰ کیا کہ حملوں کا ہدف سعودی حمایت یافتہ فورسز کی بڑی فوجی تعیناتیاں تھیں، جو مبینہ طور پر ایک نئی فوجی کارروائی کی تیاری کر رہی تھیں۔

تاحال سعودی حکومت یا سعودی قیادت والے فوجی اتحاد کی جانب سے ان حملوں پر کوئی باضابطہ ردعمل سامنے نہیں آیا۔

یمن میں امریکی مشن نے حملوں کی مذمت کرتے ہوئے انہیں "بزدلانہ کارروائی" قرار دیا اور کہا کہ یہ یمنی عوام کے خلاف حوثی باغیوں کی دہشت گردی کی ایک اور مثال ہے۔