اسرائیل نے نیا جاسوس سیٹلائٹ لانچ کر دیا

یروشلم (ڈیلی اردو ) اسرائیل نے ایک نیا جاسوس سیٹلائٹ ’اوفیک 19‘ لانچ کیا ہے، جسے دفاعی حکام نے ایک ’’اسٹریٹیجک سنگ میل‘‘ قرار دیا ہے۔ یہ سیٹلائٹ اسرائیل کی مشرق وسطیٰ میں نگرانی کی صلاحیت کو آئندہ برسوں میں مزید مضبوط بنائے گا۔

وزیر دفاع اسرائیل کاٹز نے کہا ہےکہ یہ سیٹلائٹ ایران سمیت خطے کے مختلف علاقوں میں مسلسل اور بیک وقت نگرانی کی صلاحیت فراہم کرے گا۔ انہوں نے کہا، ’’یہ ہمارے تمام دشمنوں کے لیے پیغام ہے۔  ہم ہر وقت اور ہر حالت میں آپ پر نظر رکھے ہوئے ہیں۔‘‘

اسرائیل نے رواں سال 12 روزہ جنگ کے دوران ایران کی 12,000 تصاویر جمع کی تھیں، اور یہ نیا سیٹلائٹ اس صلاحیت کو مزید بڑھائے گا۔

اسرائیل کا خلائی پروگرام کئی دہائیوں پر محیط ہے اور حالیہ برسوں میں متعدد سیٹلائٹ لانچ کیے گئے ہیں۔ اسرائیل ایرو اسپیس انڈسٹریز، جو سیٹلائٹ، میزائل، ڈرون اور طیارے تیار کرتی ہے، ملکی معیشت کا اہم ستون ہیں اور دنیا بھر کے ممالک کو دفاعی ساز و سامان فراہم کرتی ہیں۔

اسرائیلی فوج نے تاہم یہ نہیں بتایا کہ یہ سیٹلائٹ کہاں سے لانچ کیا گیا۔