اسرائیل کی امریکہ سے جدید جنگی طیاروں کے دو سکواڈرن خریدنے کی منظوری

واشنگٹن (ڈیلی اردو/روئٹرز) اسرائیل نے امریکہ سے ایف-35 اور ایف-15 آئی اے طیاروں کے دو نئے جنگی سکواڈرن خریدنے کی منظوری دے دی ہے۔

بین الاقوامی خبر رساں ادارے روئٹرز کے مطابق یہ طیارے امریکی کمپنیوں لاک ہیڈ مارٹن اور بوئنگ سے حاصل کیے جائیں گے، جبکہ اس معاہدے کی مالیت دسیوں ارب شیکل بتائی جا رہی ہے۔

اسرائیلی وزارتِ دفاع کے مطابق یہ منصوبہ حال ہی میں وزارتی کمیٹی برائے خریداری نے منظور کیا ہے، جس کے تحت ایف-35 آئی کا چوتھا سکواڈرن اور ایف-15 آئی اے کا دوسرا سکواڈرن خریدا جائے گا۔

رپورٹس کے مطابق ان طیاروں کی شمولیت کے بعد آنے والے برسوں میں اسرائیلی فضائیہ کے پاس ایف-35 آئی طیاروں کی تعداد تقریباً 100 جبکہ ایف-15 آئی اے طیاروں کی تعداد 50 تک پہنچ جائے گی۔