اسرائیل کے لبنان پر حملے جاری، 24 علاقوں کیلئے انخلا کا حکم

یروشلم (ڈیلی اردو/اے ایف پی/این این اے)اسرائیل نے ہفتے کے روز جنوبی لبنان میں فضائی حملے جبکہ اسرائیلی فوج نے النبطیہ سمیت 24 علاقوں کے رہائشیوں کو فوری انخلا کا حکم دے دیا ہے۔

لبنان کی سرکاری خبر رساں ایجنسی این این اے کے مطابق اسرائیلی فضائیہ نے ان علاقوں کو نشانہ بنایا جن کے لیے انخلا کی وارننگ جاری کی گئی تھی، جن میں الريحان اور سجد کے دیہات بھی شامل ہیں۔ یہ علاقے النبطیہ کے قریب واقع ہیں۔ تاہم یہ الزام بھی عائد کیا گیا ہے کہ اسرائیل کی جانب سے بعض ایسے مقامات پر بھی حملے کیے گئے، جن کا انخلا کے نوٹس میں ذکر نہیں تھا۔

ایجنسی کے مطابق جنوبی علاقے جزین کے گاؤں ریحان میں ایک اسرائیلی حملے میں مقامی سرکاری عہدیدار ہلاک ہو گیا۔

اے ایف پی کے مطابق النبطیہ شہر تقریباً خالی ہو چکا ہے۔ شہر اور اس کے نواحی علاقوں میں رات بھر اور ہفتے کے روز بھی توپ خانے سے گولہ باری کی گئی۔

اس سے ایک روز قبل بھی النبطیہ کے قریب علی طاہر پہاڑیوں کے اطراف میں دھماکوں اور گولہ باری کی اطلاعات موصول ہوئی تھیں۔

اسرائیلی فوج نے النبطیہ اور اس کے اطراف کے 24 مقامات کے مکینوں کو ہدایت کی کہ وہ ’’فوری طور پر اپنے گھروں کو خالی کر کے دریائے زہرانی کے شمال میں منتقل ہو جائیں۔‘‘

دریائے زہرانی سرحد سے تقریباً 45 کلومیٹر شمال میں واقع ہے۔ اسرائیل گزشتہ ماہ اس دریا کے جنوب کے تمام علاقوں کو ’’جنگی زون‘‘ قرار دے چکا ہے اور اس کے بعد سے ان علاقوں پر شدید حملے جاری ہیں۔

اسرائیلی فوج نے یہ بھی دعویٰ کیا کہ اس کی فضائیہ نے ہفتے کے روز لبنان سے اسرائیلی حدود میں داخل ہونے والے ایک ’’مشکوک فضائی آبجیکٹ‘‘ کو تباہ کر دیا۔دوسری جانب لبنانی شیعہ عسکری تنظیم حزب اللہ نے کہا ہے کہ اس کے جنگجوؤں نے جنوبی لبنان میں موجود اسرائیلی فوجی گاڑیوں پر ڈرون حملے کیے ہیں۔ یورپی یونین، امریکہ اور متعدد ممالک حزب اللہ کو ایک دہشت گرد گروہ قرار دیتے ہیں۔

ایران نواز ملیشیا حزب اللہ نے امریکی و اسرائیلی حملوں میں ایران کے سپریم لیڈر کی ہلاکت کے ردعمل میں اسرائیل پر راکٹ حملے شروع کیے تھے، جس کے بعد اسرائیل نے لبنان میں جوابی حملے شروع کر دیے تھے۔ اسرائیل اور حزب اللہ کے درمیان جنگ مارچ کے آغاز سے جاری ہے۔