افغان شہریوں کی ’جبری وطن واپسی‘ بند کی جائے، ایمنسٹی کا عالمی برادری سے مطالبہ

نیو یارک (ڈیلی اردو) ایمنسٹی انٹرنیشنل نے منگل کے روز دنیا بھر کے ممالک سے مطالبہ کیا کہ وہ افغان شہریوں کو زبردستی واپس افغانستان بھیجنے کا سلسلہ فوری طور پر بند کریں۔ اس تنظیم نے کہا کہ پاکستان، ایران اور بعض یورپی ممالک افغان مہاجرین کو ’’غیر قانونی طور پر‘‘ ملک بدر کر رہے ہیں۔

اقوام متحدہ کے مطابق اس سال اب تک تقریباً 25 لاکھ افغان شہری واپس لوٹ چکے ہیں، جو ملک کی آبادی میں چھ فیصد اضافہ ہے اور پہلے سے موجود معاشی، ماحولیاتی اور انسانی بحران کو مزید سنگین بنا رہا ہے۔

ایمنسٹی نے خبردار کیا کہ افغانستان کی بگڑتی ہوئی صورتحال میں وطن واپس لوٹنے والوں کو ’’سنگین خطرات‘‘ لاحق ہیں۔ تنظیم نے زور دیا کہ بین الاقوامی قانون کسی بھی شخص کو کسی ایسے مقام پر واپس بھیجنے سے منع کرتا ہے، جہاں اسے انسانی حقوق کی سنگین خلاف ورزیوں کا سامنا کرنا پڑ سکتا ہو۔

پاکستان، ایران اور یورپ سے جبری واپسی

پاکستان اور ایران نے حالیہ برسوں میں افغان مہاجرین کو ملک چھوڑنے پر مجبور کرنا شروع کیا ہے، جبکہ میڈیا رپورٹوں کے مطابق جرمن، آسٹرین اور یورپی یونین کے اہلکار بھی کابل میں طالبان حکام کے ساتھ افغان شہریوں کی واپسی کے لیے مذاکرات کر رہے ہیں۔ پاکستان کا دعویٰ ہے کہ وہاں مقیم افغان مہاجرین میں ’’دہشت گرد اور مجرم‘‘ بھی شامل ہیں۔

ایمنسٹی نے کہا ہے کہ یہ اقدامات اس حقیقت کو نظرانداز کرتے ہیں کہ افغان شہری اپنے ملک سے کیوں فرار ہوئے تھے اور اگر واپس بھیجے گئے تو انہیں کس قدر خطرات کا سامنا ہوگا۔ افغانستان میں خواتین اور لڑکیوں پر سخت پابندیاں عائد ہیں، جبکہ وطن لوٹنے والے باشندوں کو روزگار کے مواقع بھی دستیاب نہیں ہیں۔

بین الاقوامی امداد میں کمی

غیر ملکی امداد میں بڑے پیمانے پر کٹوتیوں نے افغان حکومت کے لیے مشکلات بڑھا دی ہیں۔ اقوام متحدہ، این جی اوز اور طالبان حکام نے واپس وطن لوٹنے والے افغان شہریوں کی مدد کے لیے مزید فنڈنگ کی اپیل کی ہے۔