امریکہ نے پاکستان، افغانستان، بنگلہ دیش، ایران سمیت 75 ممالک کے امیگرنٹ ویزے معطل کر دیے

واشنگٹن (ڈیلی اردو) امریکہ نے پاکستان اور ایران سمیت 75 ممالک سے تعلق رکھنے والے شہریوں کے امیگرنٹ ویزوں کی پراسیسنگ عارضی طور پر روک دی ہے۔ امریکی محکمہ خارجہ کے مطابق یہ فیصلہ اُن ممالک کے شہریوں سے متعلق ہے جن کے بارے میں دعویٰ کیا گیا ہے کہ وہ امریکہ پہنچتے ہی عوامی فلاح و بہبود (ویلفیئر) کے نظام پر ناقابلِ قبول حد تک انحصار کرتے ہیں۔

بدھ کو سوشل میڈیا پلیٹ فارم ایکس پر جاری بیان میں امریکی محکمہ خارجہ نے کہا کہ ان 75 ممالک سے آنے والے تارکینِ وطن کے امیگرنٹ ویزوں کی پراسیسنگ اُس وقت تک معطل رہے گی جب تک یہ یقینی نہ بنا لیا جائے کہ نئے آنے والے افراد امریکی عوام کے وسائل پر بوجھ نہیں بنیں گے۔

محکمہ خارجہ نے اگرچہ متاثرہ ممالک کی مکمل فہرست سرکاری طور پر جاری نہیں کی، تاہم امریکی میڈیا اور فوکس نیوز کی رپورٹس کے مطابق جن ممالک کے شہری اس پابندی سے متاثر ہوں گے، اُن میں پاکستان بھی شامل ہے۔ اس حوالے سے امریکی محکمہ خارجہ کے ایک ترجمان نے بی بی سی کے نمائندے روحان احمد کو بتایا کہ “ہم فوکس نیوز کی خبر کی تصدیق کر سکتے ہیں۔”

محکمہ خارجہ کے مطابق اس اقدام سے درجنوں ممالک متاثر ہوں گے جن میں صومالیہ، ہیٹی، ایران اور اریٹیریا شامل ہیں۔ ان ممالک کے شہریوں پر الزام عائد کیا جاتا ہے کہ وہ امریکہ پہنچتے ہی اکثر سرکاری امداد کے محتاج بن جاتے ہیں۔ بیان میں مزید کہا گیا کہ “ہم یہ یقینی بنانے کے لیے کام کر رہے ہیں کہ امریکی عوام کی سخاوت کا مزید غلط استعمال نہ ہو سکے۔”

دوسری مدتِ صدارت کے آغاز کے بعد صدر ڈونلڈ ٹرمپ نے قانونی اور غیرقانونی دونوں اقسام کی امیگریشن محدود کرنے کے اقدامات تیز کر دیے ہیں۔ اس سے قبل بھی ان کی انتظامیہ برازیل، ایران، روس اور صومالیہ سے تعلق رکھنے والے افراد کی ویزا پراسیسنگ روک چکی ہے۔

امریکی میڈیا رپورٹس کے مطابق اس نئے حکمنامے پر 21 جنوری سے عملدرآمد شروع ہو گا۔ ایسوسی ایٹڈ پریس کے مطابق امریکی محکمہ خارجہ نے قونصل افسران کو ہدایات جاری کر دی ہیں کہ امیگریشن کے خواہشمند افراد کی درخواستوں کی کارروائی روک دی جائے۔ تاہم اس پابندی کا اطلاق نان امیگریشن یعنی عارضی سیاحتی اور کاروباری ویزوں پر نہیں ہو گا۔

متاثرہ ممالک کی مکمل فہرست

ڈیلی اردو کے مطابق جن 75 ممالک کے شہریوں کے لیے امیگرنٹ ویزا پراسیسنگ روکی گئی ہے، اُن کی مکمل فہرست درج ذیل ہے۔

افغانستان، البانیہ، الجزائر، اینٹیگا اینڈ باربوڈا، آرمینیا، آذربائیجان، بہاماس، بنگلہ دیش، بارباڈوس، بیلاروس، بیلائز، بھوٹان، بوسنیا، برازیل، میانمار (برما)، کمبوڈیا، کیمرون، کیپ وردے، کولمبیا، آئیوری کوسٹ، کیوبا، جمہوریہ کانگو (ڈیموکریٹک)، ڈومینیکا، مصر، اریٹیریا، ایتھوپیا، فجی، گیمبیا، جارجیا، گھانا، گریناڈا، گوئٹے مالا، گنی، ہیٹی، ایران، عراق، جمیکا، اردن، قازقستان، کوسوو، کویت، کرغزستان، لاؤس، لبنان، لائبیریا، لیبیا، مقدونیہ، مالدووا، منگولیا، مونٹی نیگرو، مراکش، نیپال، نکاراگوا، نائجیریا، پاکستان، جمہوریہ کانگو، روس، روانڈا، سینٹ کٹس اینڈ نیوس، سینٹ لوشیا، سینٹ ونسنٹ اینڈ گریناڈینز، سینیگال، سیرالیون، صومالیہ، جنوبی سوڈان، سوڈان، شام، تنزانیہ، تھائی لینڈ، ٹوگو، تیونس، یوگنڈا، یوراگوئے، ازبکستان اور یمن شامل ہے۔