امریکی صدر کا آبنائے ہرمز میں جہاز نکالنے کا اعلان، مداخلت پر طاقت کی دھمکی

واشنگٹن (ڈیلی اردو) امریکہ کے صدر ڈونلڈ ٹرمپ نے اعلان کیا ہے کہ پیر کی صبح سے آبنائے ہرمز میں پھنسے جہازوں کو نکالنے کے لیے ایک آپریشن شروع کیا جائے گا، جسے ’پروجیکٹ فریڈم‘ کا نام دیا گیا ہے۔ انہوں نے خبردار کیا ہے کہ اس عمل میں کسی بھی قسم کی مداخلت کی گئی تو اس کا جواب طاقت کے ذریعے دیا جائے گا۔

سوشل میڈیا پر جاری بیان میں صدر ٹرمپ کا کہنا تھا کہ مختلف ممالک نے امریکہ سے درخواست کی ہے کہ وہ ان کے جہازوں کو محفوظ طریقے سے آبنائے ہرمز سے نکالنے میں مدد فراہم کرے۔ ان کے مطابق یہ وہ ممالک ہیں جو مشرقِ وسطیٰ میں جاری تنازع میں شامل نہیں۔

انہوں نے کہا کہ امریکہ ان جہازوں اور ان کے عملے کی محفوظ روانگی کے لیے رہنمائی فراہم کرے گا تاکہ وہ اپنا تجارتی عمل جاری رکھ سکیں۔ ٹرمپ کے مطابق یہ اقدام انسانی ہمدردی کی بنیاد پر کیا جا رہا ہے، کیونکہ کئی جہازوں پر خوراک اور ضروری سامان کی کمی کی اطلاعات ہیں۔

صدر ٹرمپ نے مزید کہا کہ امریکہ کے نمائندے ایران کے ساتھ بات چیت میں مصروف ہیں اور یہ مذاکرات مثبت پیش رفت کا باعث بن سکتے ہیں۔ ان کے بقول یہ اقدام تنازع میں کمی اور خیرسگالی کو فروغ دینے میں مدد دے سکتا ہے۔

دوسری جانب برطانیہ کے میری ٹائم ٹریڈ آپریشنز نے اطلاع دی ہے کہ آبنائے ہرمز میں ایک کارگو جہاز پر چھوٹی کشتیوں کی جانب سے حملہ کیا گیا، تاہم عملے کے تمام افراد محفوظ رہے اور کسی ماحولیاتی نقصان کی اطلاع نہیں ملی۔