امریکی طیاروں نے ایک بار پھر ایران میں فضائی حملے کیے، پاسداران انقلاب کی جوابی کارروائیاں

واشنگٹن (ڈیلی اردو رپورٹ) امریکا کی جانب سے ایرانی جزیرے قشم میں فوجی تنصیبات پر حملے کیے گئے، جس کے بعد پاسداران انقلاب نے امریکی اہداف کو نشانہ بنانے کی کارروائیوں کا اعلان کیا ہے، جبکہ خطے میں کشیدگی مزید بڑھ گئی ہے۔

امریکی سینٹرل کمانڈ (سینٹکام) کے مطابق امریکی فورسز نے 2 جون کو ایران کی جانب سے مشرق وسطیٰ میں مبینہ حملوں کی کوششوں کے جواب میں ایرانی بیلسٹک میزائلوں اور ڈرونز کو ناکام بنایا اور جزیرہ قشم میں دفاعی کارروائیاں کیں۔

سینٹکام کے مطابق ایران نے خطے کے مختلف ممالک کی جانب متعدد بیلسٹک میزائل داغے، تاہم کوئی بھی اپنے ہدف تک نہیں پہنچ سکا۔ 

امریکی فوج کے مطابق کویت کی جانب داغے گئے دو ایرانی میزائل راستے میں گر گئے یا ٹکڑے ٹکڑے ہو گئے، جبکہ بحرین کی جانب داغے گئے تین میزائل امریکی اور بحرینی فضائی دفاعی نظام نے مار گرائے۔

امریکی فوج کے مطابق اس سے کچھ دیر قبل ایران کی جانب سے علاقائی سمندری راستوں سے گزرنے والے جہازوں کی سمت بھیجے گئے تین ڈرونز بھی تباہ کر دیے گئے۔

سینٹکام نے مزید کہا کہ امریکی فورسز نے جزیرہ قشم میں ایرانی فوج کے ایک گراؤنڈ کنٹرول اسٹیشن کو بھی نشانہ بنایا، جبکہ امریکی فوج کے مطابق ان کارروائیوں میں کوئی امریکی اہلکار زخمی نہیں ہوا۔

دوسری جانب پاسداران انقلاب نے کہا ہے کہ جزیرہ قشم میں ایک کمیونیکیشن ٹاور کو نشانہ بنائے جانے کے بعد امریکی اہداف کے خلاف کارروائیاں کی گئیں۔

ایرانی میڈیا کے مطابق کارروائیوں میں امریکی بحری اور فضائی تنصیبات کو نشانہ بنایا گیا، جبکہ آبنائے ہرمز کے قریب بحری سرگرمیوں اور جہازوں پر بھی حملوں کی اطلاعات سامنے آئی ہیں۔

پاسداران انقلاب نے کہا ہے کہ آبنائے ہرمز کی سکیورٹی کو متاثر کرنے کے نتائج ہوں گے، جبکہ خطے میں صورتحال تیزی سے تبدیل ہو رہی ہے۔

تاحال ان حملوں اور جوابی کارروائیوں سے ہونے والے نقصانات یا جانی نقصان کے بارے میں آزاد ذرائع سے مکمل تصدیق سامنے نہیں آئی۔