ایتھنز کے قریب فضائی مظاہرے کے دوران یونانی جنگی طیارہ تباہ، 2 پائلٹ ہلاک

ایتھنز (ڈیلی اردو ) یونان کے دارالحکومت ایتھنز کے قریب فضائی مظاہرے کے دوران ایک جنگی طیارہ حادثے کا شکار ہوگیا، جس کے نتیجے میں طیارے میں سوار دونوں پائلٹ ہلاک ہوگئے۔

حادثہ ہفتے کے روز تاناگرا ایئر بیس کے قریب پیش آیا، جہاں یونانی فضائیہ کا ایف 4 فینٹم جنگی طیارہ ’’ایتھنز ایئر شو ویک‘‘ کی سرگرمیوں میں حصہ لے رہا تھا۔ حکام کے مطابق طیارہ ایئر بیس سے تقریباً دو کلومیٹر دور گر کر تباہ ہوا۔

عینی شاہدین کے مطابق طیارہ کم بلندی پر پرواز کرتے ہوئے دائیں جانب مڑا اور چند ہی لمحوں بعد زمین سے ٹکرا گیا، جس کے نتیجے میں طیارے میں آگ بھڑک اٹھی اور علاقے میں دھویں کے بادل چھا گئے۔

حادثے کے بعد آگ بجھانے اور صورتحال پر قابو پانے کے لیے 11 طیاروں اور ہیلی کاپٹروں نے کارروائی میں حصہ لیا۔ حادثے کے نتیجے میں قریبی جنگلاتی علاقے میں بھی آگ پھیل گئی، تاہم حکام کے مطابق وہاں موجود شہریوں یا راہگیروں میں سے کوئی زخمی نہیں ہوا۔

حادثے کے فوراً بعد فضائی اڈے پر موجود افراد کو لاؤڈ اسپیکر کے ذریعے علاقہ خالی کرنے کی ہدایت کی گئی۔ حادثے کی وجوہات جاننے کے لیے متعلقہ حکام کی جانب سے تحقیقات شروع کیے جانے کی توقع ہے۔

ایف 4 فینٹم طیارہ سالانہ ’’ایتھنز ایئر شو ویک‘‘ میں شریک تھا، جس میں مختلف ممالک کی فوجی اور شہری فضائی ٹیمیں اور طیارے اپنی صلاحیتوں کا مظاہرہ کرتے ہیں۔