ایتھوپیا کے دارالحکومت میں فوجی ہیڈکوارٹر میں دھماکا، نوعیت معلوم نہ ہوسکی

ادیس ابابا(ڈیلی اردو) ایتھوپیا کے دارالحکومت ادیس ابابا میں فوج کے مرکزی ہیڈکوارٹر میں بدھ اور جمعرات کی درمیانی شب دھماکے کی آواز سنی گئی، تاہم فوری طور پر دھماکے کی نوعیت یا اس کے ذمہ داروں کے بارے میں کوئی تصدیق سامنے نہیں آئی۔

فرانسیسی خبر رساں ادارے کے مطابق ایک سفارتی ذریعے اور مقامی شہری نے دھماکے کی تصدیق کی۔ ایک شہری کا کہنا تھا کہ اس نے چند منٹ تک تشویش ناک آوازیں سنیں، جس کے بعد زور دار دھماکا ہوا۔

ایک غیر ملکی سفارتی ذریعے کے مطابق دھماکے کی آواز مقامی وقت کے مطابق تقریباً نصف شب ایتھوپین نیشنل ڈیفنس فورس کے ہیڈکوارٹر سے سنائی دی، تاہم ذریعے نے یہ واضح نہیں کیا کہ دھماکا کس نوعیت کا تھا اور اس کے پیچھے کون ملوث ہے۔

ایتھوپیا میں دوبارہ لڑائی کا خدشہ

یہ واقعہ ایسے وقت میں پیش آیا ہے جب ایتھوپیا کی وفاقی فورسز اور ٹائیگرے پیپلز لبریشن فرنٹ کے درمیان 23 ستمبر سے شدید جھڑپیں جاری ہیں۔ تازہ کشیدگی نے شمالی ایتھوپیا میں 2020 سے 2022 کے دوران جاری رہنے والی تباہ کن جنگ دوبارہ شروع ہونے کے خدشات بڑھا دیے ہیں۔

اس جنگ میں تقریباً 6 لاکھ افراد کے ہلاک ہونے کا اندازہ پیش کیا گیا تھا۔ حالیہ لڑائی کے باعث خطے میں ایک بار پھر بڑے پیمانے پر کشیدگی اور انسانی بحران کے خدشات ظاہر کیے جا رہے ہیں۔

دارالحکومت میں ڈرون پروازوں پر پابندی

دھماکے سے چند گھنٹے قبل ایتھوپیا کی نیشنل انٹیلی جنس اینڈ سکیورٹی سروس نے دارالحکومت ادیس ابابا کے اطراف ڈرون طیاروں کی پرواز پر پابندی عائد کی تھی۔

حکام کی جانب سے پابندی کی مخصوص وجہ فوری طور پر واضح نہیں کی گئی، جبکہ فوجی ہیڈکوارٹر میں ہونے والے دھماکے کے حوالے سے مزید تحقیقات جاری ہیں۔