ایران: سیستان و بلوچستان میں دو الگ حملے، خواتین بسیج کمانڈر اور پولیس اہلکار ہلاک، 3 اہلکار زخمی

تہران(ڈیلی اردو)  ایران کے جنوب مشرقی صوبے سیستان و بلوچستان کے ضلع مہرستان میں دو الگ الگ مسلح حملوں کے دوران خواتین کی بسیج یونٹ کی کمانڈر افسانہ عقیلا اور پولیس اہلکار محمد علی شہریاری ہلاک ہوگئے۔ پولیس کی گاڑی پر فائرنگ کے واقعے میں مزید تین اہلکار زخمی ہونے کی اطلاعات ہیں۔

ایرانی خبر رساں ادارے تسنیم اور سرکاری ذرائع کے مطابق افسانہ عقیلا کو ان کے گھر کے باہر فائرنگ کرکے نشانہ بنایا گیا۔ وہ مہرستان میں خواتین کی افضل بسیج یونٹ کی کمانڈر تھیں اور ان کا تعلق زابل سے بتایا گیا ہے۔

دوسرے واقعے میں نامعلوم مسلح افراد نے مہرستان میں پولیس کی گاڑی پر فائرنگ کی، جس کے نتیجے میں فرسٹ سارجنٹ محمد علی شہریاری ہلاک ہوگئے۔ مقامی بلوچ حقوق کی تنظیم حال وش کے مطابق اس حملے میں تین دیگر اہلکار بھی زخمی ہوئے، تاہم پولیس کے سرکاری بیان میں زخمیوں کی تعداد نہیں بتائی گئی۔ دونوں حملوں کی ذمہ داری فوری طور پر کسی گروہ نے قبول نہیں کی۔

خبر رساں ادارے اے ایف پی، الجزیرہ اور ایران وائر کے مطابق یہ واقعات ایسے وقت پیش آئے ہیں جب سیستان و بلوچستان میں پولیس اور سکیورٹی اہلکاروں کے خلاف مسلح حملوں اور جھڑپوں میں اضافہ دیکھا جارہا ہے۔ یہ صوبہ پاکستان اور افغانستان کی سرحدوں کے قریب واقع ہے اور طویل عرصے سے مسلح گروہوں اور ایرانی سکیورٹی فورسز کے درمیان کشیدگی کا مرکز رہا ہے۔

رپورٹس کے مطابق اکتوبر کے ابتدائی دنوں میں بھی صوبے کے مختلف علاقوں میں پولیس چوکیوں، گشتی گاڑیوں اور سکیورٹی اہلکاروں کو نشانہ بنانے کے واقعات پیش آئے۔ تاہم مہرستان میں ہونے والے تازہ حملوں کے ذمہ داروں اور ان کے محرکات کے بارے میں تاحال واضح معلومات سامنے نہیں آئیں۔