ایران کا میزائل پروگرام مزید جدید بنانے کا اعلان، رینج اور رفتار بڑھانے کا فیصلہ

تہران(ڈیلی اردو) ایران نے اپنے میزائل نظام کی صلاحیتوں میں مزید اضافے کا فیصلہ کرتے ہوئے مختلف میزائلوں کی رینج، رفتار اور اہداف کو نشانہ بنانے کی صلاحیت بہتر بنانے پر کام شروع کرنے کا اعلان کیا ہے۔

ایرانی فوج کے ترجمان بریگیڈیئر جنرل محمد اکرمی نیا نے کہا ہے کہ خطے میں ایران سے تقریباً ایک ہزار کلومیٹر تک فاصلے پر موجود ممکنہ دشمن اہداف کے پیش نظر میزائلوں کی مار بڑھانے کی ضرورت محسوس کی گئی ہے۔

ان کے مطابق ایران اور امریکا کے درمیان حالیہ جنگ کے دوران استعمال ہونے والے ایرانی میزائلوں نے مؤثر کارکردگی دکھائی، جس کے بعد ان کے نظام میں مزید بہتری لانے کا فیصلہ کیا گیا ہے۔

ایرانی فوجی ترجمان نے دعویٰ کیا کہ بری فوج کے میزائلوں نے کویت میں موجود دشمن کے فوجی اڈوں کو نشانہ بنایا، جبکہ ایرانی بحریہ کے سمندر سے داغے جانے والے کروز میزائلوں نے دشمن کے بحری جہازوں کو ہدف بنایا۔

جنرل محمد اکرمی نیا کے مطابق مستقبل میں ایرانی میزائلوں کی رفتار اور مار کی حد بڑھانے کے ساتھ ساتھ ان کی اہداف کو زیادہ مؤثر انداز میں نشانہ بنانے کی صلاحیت بھی بہتر کی جائے گی۔

ایرانی فوج کے ترجمان کا کہنا تھا کہ میزائلوں کی اپ گریڈیشن کا عمل شروع کردیا گیا ہے اور اس اقدام کا مقصد ایران کی دفاعی صلاحیتوں کو مزید مضبوط بنانا ہے۔ تاہم ان دعوؤں اور میزائلوں کی کارکردگی سے متعلق آزاد ذرائع کی جانب سے تفصیلی تصدیق سامنے نہیں آئی۔