باجوڑ میں سیکیورٹی فورسز کی کارروائی، 5 دہشتگرد ہلاک

باجوڑ(ڈیلی اردو) خیبرپختونخواہ کے شورش زدہ قبائلی ضلع باجوڑ کے ایک دور افتادہ اور دشوار گزار پہاڑی علاقے میں سیکیورٹی فورسز نے دہشتگردوں کے خفیہ ٹھکانوں کے خلاف کارروائی کرتے ہوئے 5 دہشتگردوں کو ہلاک کردیا۔

سیکیورٹی ذرائع کے مطابق کارروائی کے دوران دہشتگردوں کے زیرِ استعمال متعدد خفیہ ٹھکانوں کو نشانہ بنایا گیا، جس کے نتیجے میں کئی کمین گاہیں تباہ ہوگئیں جبکہ 5 دہشتگرد ہلاک ہوئے۔

ذرائع کا کہنا ہے کہ سیکیورٹی فورسز نے دہشتگردوں کی موجودگی اور سرگرمیوں سے متعلق اطلاعات ملنے کے بعد یہ کارروائی کی۔ دشوار گزار پہاڑی علاقے میں قائم ٹھکانوں کی تباہی سے دہشتگردوں کے مبینہ نیٹ ورک اور وہاں سے کارروائیاں کرنے کی صلاحیت کو نقصان پہنچا ہے۔

سیکیورٹی ذرائع کے مطابق باجوڑ سمیت خیبر پختونخوا کے مختلف علاقوں میں دہشتگردوں کے خلاف انٹیلی جنس بنیادوں پر کارروائیاں جاری ہیں، جن کا مقصد خفیہ ٹھکانوں اور دہشتگردی کے ممکنہ مراکز کو ختم کرکے حملوں کی روک تھام یقینی بنانا ہے۔