باجوڑ میں فوجی قافلے پر گھات لگا کر حملہ، 2 پاکستانی فوجی ہلاک، 19 زخمی

خار+  پشاور (نمائندگان ڈیلی اردو) پاکستان کے شورش زدہ صوبے خیبر پختونخوا کے قبائلی ضلع باجوڑ کے علاقے انایتہ قلعہ پٹھاک میں آج صبح ایک فوجی قافلے پر گھات لگا کر فائرنگ کی گئی، جس کے نتیجے میں دو سکیورٹی اہلکار ہلاک اور تقریباً 19 زخمی ہو گئے۔ ایک ذریعے نے ڈیلی اردو کو بتایا کہ زیادہ تر زخمیوں کو شیل کے ٹکڑوں سے زخم آئے ہیں، تاہم آٹھ اہلکار گولی لگنے سے زخمی ہوئے ہیں اور زیرِ علاج ہیں۔

دریں اثنا تحصیل ماموند کے علاقے ایراب میں ایک گھر پر گولہ گرنے سے گھر کا سربراہ، ایک خاتون اور سات سالہ بچہ ہلاک جبکہ دو افراد زخمی ہو گئے۔

اسی دوران پاکستانی فوج اور سکیورٹی فورسز نے ضلع باجوڑ میں عسکریت پسندوں کے خلاف ’’ٹارگٹڈ آپریشن‘‘ شروع کر رکھا ہے، جس کے باعث ہزاروں مقامی باشندے محفوظ مقامات کی جانب نقل مکانی کر رہے ہیں۔

اگرچہ اس کارروائی کا باضابطہ اعلان نہیں کیا گیا، لیکن سرکاری افسر سعید اللہ کے مطابق یہ بڑے پیمانے کی فوجی کارروائی نہیں، بلکہ شدت پسندوں کے مخصوص ٹھکانوں کو نشانہ بنایا جا رہا ہے تاکہ شہری جانی نقصان سے بچ سکیں۔ ایک اور سرکاری افسر شاہد علی نے بتایا کہ نقل مکانی کرنے والوں کی تعداد تیزی سے بڑھ کر تقریباً ایک لاکھ تک پہنچ گئی ہے۔

مقامی باشندوں کے مطابق سکیورٹی فورسز نے ہیلی کاپٹروں کی مدد سے سرحدی پہاڑی علاقوں میں بمباری کی۔ صوبائی پولیس چیف ذوالفقار حمید نے تصدیق کی کہ آپریشن جاری ہے۔

کالعدم تنظیم تحریک طالبان پاکستان (ٹی ٹی پی) کو افغان طالبان کا قریبی اتحادی سمجھا جاتا ہے۔ اگست 2021 میں افغان طالبان کے اقتدار میں آنے کے بعد متعدد ٹی ٹی پی رہنما اور جنگجو افغانستان میں منتقل ہوئے اور وہاں سے باجوڑ سمیت پاکستانی علاقوں میں حملے کیے۔ اس سے قبل 2009 میں بھی باجوڑ میں پاکستانی اور غیر ملکی جنگجوؤں کے خلاف بڑا فوجی آپریشن کیا گیا تھا، جس میں لاکھوں لوگ بے گھر ہوئے تھے۔