ایران میں حکومتی تبدیلی کی کبھی پروا نہیں کی، امریکی صدر ٹرمپ

پیرس (ڈیلی اردو) فرانس میں ایویاں لے باں کے سیاحتی قصبے میں جاری صنعتی طور پر ترقی یافتہ ممالک کے گروپ جی سیون کی سمٹ کے موقع پر امریکی صدر ڈونلڈ ٹرمپ نے منگل 16 جون کے روز صحافیوں کو بتایا کہ انہوں نے ایران میں ’’حکومتی تبدیلی کے بارے میں کبھی پروا نہیں کی‘‘ تھی۔

ایویاں سے موصولہ رپورٹوں کے مطابق صدر ٹرمپ نے کہا کہ انہوں نے اس بات کو کبھی اہمیت نہیں دی تھی کہ اسلامی جمہوریہ کے طور پر ایران میں حکومت تبدیل ہونا چاہیے، تاہم ساتھ ہی انہوں نے کہا کہ یہ تبدیلی لیکن کسی بھی طرح جیسے آ تو گئی ہے۔

ڈونلڈ ٹرمپ نے کہا، ’’میں نے کبھی اس بات کو وقعت نہیں دی تھی کہ ایران میں حکومت تبدیل ہونا چاہیے۔ لیکن  میرا اندازہ ہے کہ آپ بھی دیکھ رہے ہیں کہ حکومت تبدیل تو ہو گئی ہے۔‘‘

امریکی صدر نے فرانس اور سوئٹزرلینڈ کے درمیان جھیل جنیوا کے کنارے واقع فرانسیسی مقام ایویاں میں صحافیوں سے یہ بات منگل کے روز خلیجی ریاست قطر کے امیر تمیم بن حمد الثانی کے ساتھ اپنی ملاقات کے بعد کہی۔

صحافیوں سے اسی گفتگو کے دوران امریکی صدر نے یہ بھی کہا کہ امریکہ روس کے خلاف اپنی طرف سے پابندیاں دوبارہ بھی عائد کر سکتا ہے۔

ایویاں میں جمع جی سیون ممالک کے سربراہان مملکت و حکومت اپنے سربراہی اجلاس میں امریکی ایرانی امن معاہدے، اس کے ممکنہ اثرات، روسی یوکرینی جنگ اور کئی دیگر اہم بین الاقوامی امور پر باہمی مشاورت کر رہے ہیں۔