باجوڑ میں پولیس وین اور ایمبولینس پر فائرنگ، 5 اہلکاروں سمیت 9 افراد زخمی

باجوڑ (نمائندہ ڈیلی اردو) پاکستان کے شورش زدہ صوبہ  خیبر پختونخوا کے ضلع باجوڑ میں نامعلوم حملہ آوروں کی فائرنگ سے پولیس موبائل اور ریسکیو ایمبولینس کو نشانہ بنایا گیا، جس کے نتیجے میں 5 پولیس اہلکاروں سمیت 9 افراد زخمی ہو گئے۔

تفصیلات کے مطابق تحصیل خار کے علاقے رشکئی میں نامعلوم افراد نے پولیس وین پر فائرنگ کی۔ پولیس ترجمان کے مطابق حملے میں 5 پولیس اہلکار زخمی ہوئے۔

ذرائع کے مطابق زخمی اہلکاروں کو منتقل کرنے کے لیے آنے والی ریسکیو ایمبولینس پر بھی حملہ آوروں نے فائرنگ کر دی، جس کے نتیجے میں ایک ریسکیو ڈرائیور اور 3 شہری زخمی ہو گئے۔

تمام زخمیوں کو فوری طور پر قریبی ہسپتال منتقل کر دیا گیا، جہاں انہیں طبی امداد فراہم کی جا رہی ہے۔

واقعے کے بعد پولیس کی بھاری نفری نے علاقے کو گھیرے میں لے لیا اور حملہ آوروں کی تلاش کے لیے سرچ آپریشن شروع کر دیا گیا ہے۔