برطانوی جزیرے پر دھماکا، ایک شخص ہلاک، 12 لاپتہ

لندن (ڈیلی اردو) برطانوی جزیرے جرسی کے رہائشی علاقے میں زوردار دھماکے سے ایک شخص ہلاک جبکہ 12 افراد لاپتہ ہوگئے۔

Jersey Channel islands explosion pic.twitter.com/KqEUDtyqTo

— Daniel Hunt (@just_daniel1411) December 10, 2022

پولیس کا کہنا ہے کہ دھماکے سے لگنے والی آگ بجھا دی گئی ہے لیکن ایمرجنسی سروسز جائے وقوعہ پر کارروائیوں میں مصروف ہیں۔

غیر ملکی خبر ایجنسی کے مطابق صبح 4 بجے ہونے والے دھماکے میں ایک درجن کے قریب افراد لاپتہ ہیں۔ ہلاکتوں میں اضافے کا خدشہ ظاہر کیا جا رہا ہے۔

جرسی کے پولیس چیف رابن اسمتھ نے میڈیا کو بتایا کہ ایک شخص ہلاک ہوا جبکہ دو زخمیوں کو اسپتال لے جایا گیا۔

ان کا کہنا تھا کہ کئی افراد ایسے ہیں جن کے بارے میں کوئی معلومات نہیں ہیں لہذا تلاش اور ریسکیو آپریشن جاری ہے۔

واضح رہے کہ جرسی برطانیہ اور فرانس کے درمیان واقع ایک جزیرہ ہے جس میں صرف ایک لاکھ افراد رہتے ہیں اور یہ برطانوی بادشاہ کے ماتحت ایک خود مختار علاقہ ہے۔