بلوچستان: خضدار میں کنسٹرکشن کمپنی کے کیمپ پر حملہ، اربوں کی مشینری نذرِ آتش

خضدار (نمائندہ ڈیلی اردو) بلوچستان کے ضلع خضدار میں نامعلوم دہشتگردوں نے ایک کنسٹرکشن کمپنی کے کیمپ پر حملہ کر کے اربوں روپے مالیت کی مشینری اور گاڑیاں نذرِ آتش کر دیں۔

ذرائع کے مطابق یہ واقعہ گزشتہ رات خضدار کے علاقے وڈھ میں پیش آیا، جہاں حملہ آوروں نے کیمپ میں موجود چوکیدار کو یرغمال بنانے کے بعد اس کے ہاتھ پاوں باندھ کر قریب چھوڑ دیا۔

ڈیلی اردو کے مطابق، کمپنی بلوچستان کے مختلف علاقوں میں شاہراہوں کی تعمیر کے منصوبوں پر کام کر رہی تھی۔ حالیہ عرصے میں مختلف علاقوں میں ٹھیکے مکمل ہونے کے بعد تمام مشینری اور گاڑیاں خضدار کے مرکزی کیمپ میں منتقل کی گئی تھیں، جو اس حملے کی زد میں آگئیں۔

حملے کے نتیجے میں کمپنی کو بھاری مالی نقصان پہنچا ہے، جبکہ مقامی انتظامیہ اور سیکیورٹی فورسز نے واقعے کی تحقیقات شروع کر دی ہیں۔ ابھی تک کسی گروہ نے حملے کی ذمہ داری قبول نہیں کی۔