بلوچستان: زیارت میں گولیوں سے چھلنی دو لاشیں برآمد

کوئٹہ (نمائندہ ڈیلی اردو) صوبہ بلوچستان کے ضلع زیارت کے علاقے منگی میں نامعلوم مسلح افراد نے ایک گاڑی کو روک کر دو افراد کو اغوا کر لیا اور پھر بعد میں انہیں ہلاک کر دیا گیا۔ متاثرہ افراد کی گولیوں سے چھلنی لاشیں منگی ڈیم کے قریب ایک پہاڑی علاقے سے ملی ہیں۔

مقامی حکام کا کہنا ہے کہ مسلح افراد نے منگی ڈیم کے علاقے کی طرف جانے والی سڑک کو پہلے بند کر دیا تھا اور جن دو افراد کو ہلاک کیا گیا ہے ان کے قومی شناختی کارڈ سے ظاہر ہوتا ہے کہ ان کا تعلق پنجاب سے تھا۔

علاقے کے لوگوں نے ان کی لاشوں کی موجودگی کی اطلاع مقامی انتظامیہ کو دی جس کے بعد اہلکاروں نے لاشوں کو قریبی ہسپتال میں منتقل کیا۔

اطلاعات کے مطابق سکیورٹی فورسز نے اس علاقے کا محاصرہ کر لیا ہے اور اس قتل میں ملوث افراد کی تلاش جاری ہے۔