بلوچستان: مستونگ میں ریلوے ٹریک پر بم دھماکا، جعفر ایکسپریس کی 6 بوگیاں پٹڑی سے اتر گئیں

سبی (س ط ع) پاکستان کے شورش زدہ صوبے  بلوچستان کے ضلع مستونگ میں ریلوے ٹریک پر بم دھماکے کے نتیجے میں کوئٹہ سے راولپنڈی جانے والی جعفر ایکسپریس کی 6 بوگیاں پٹڑی سے اتر گئیں۔ ریلوے حکام کے مطابق دھماکا ٹرین کے گزرنے کے دوران ہوا تاہم کوئی جانی نقصان نہیں ہوا۔ سیکیورٹی فورسز اور امدادی ٹیمیں موقع پر پہنچ گئیں اور ٹریک کی بحالی شروع کردی گئی ہے۔

دھماکے کے بعد بلوچستان سے اندرون ملک ٹرین سروس عارضی طور پر معطل کر دی گئی۔ پشاور سے کوئٹہ اور کوئٹہ سے راولپنڈی جانے والی جعفر ایکسپریس 10، 11، 13 اور 14 اگست کو نہیں چلے گی، جب کہ بولان میل کی کوئٹہ سے کراچی سروس 17 اگست سے بحال ہو گی۔

وزیر اعلیٰ بلوچستان سرفراز بگٹی نے واقعے کی مذمت کرتے ہوئے کہا کہ جو بھی ریاست سے بات کرنا چاہتا ہے وہ ہتھیار ڈال کر آئے، آئین کے دائرے میں رہتے ہوئے بات چیت کے دروازے کھلے ہیں۔ ان کا کہنا تھا کہ ملک کے دیگر حصوں میں دہشت گردی کو دہشت گردی کہا جاتا ہے مگر بلوچستان میں اسے مختلف نام دیے جاتے ہیں، یہ تفریق ختم ہونی چاہیے۔

انہوں نے میڈیا سے اپیل کی کہ بلوچستان کو چند مخصوص افراد کی عینک سے نہ دیکھا جائے بلکہ صوبے کی اصل تصویر دنیا کے سامنے لائی جائے۔ ساتھ ہی انہوں نے اعلان کیا کہ ایرانی زائرین کی سہولت کے لیے فضائی اور فیری سروس کا آغاز کیا جا رہا ہے۔