بلوچستان میں سکیورٹی فورسز کی تین کارروائیاں، بی ایل اے سے وابستہ 8 مبینہ دہشت گرد ہلاک، 490 کلوگرام دھماکا خیز مواد برآمد

راولپنڈی(ڈیلی اردو) بلوچستان کے اضلاع کوئٹہ، نوشکی اور خضدار میں سکیورٹی فورسز نے تین الگ الگ انٹیلی جنس بنیادوں پر کارروائیاں کرتے ہوئے 8 مبینہ دہشت گردوں کو ہلاک کرنے اور اسلحہ، گولہ بارود سمیت 490 کلوگرام دھماکا خیز مواد برآمد کرنے کا دعویٰ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق یہ کارروائیاں 17 اکتوبر 2026 کو دہشت گردوں کی موجودگی سے متعلق اطلاعات کی بنیاد پر کی گئیں۔ بیان میں ہلاک ہونے والوں کو بھارتی سرپرستی میں سرگرم کالعدم تنظیم بی ایل اے سے وابستہ قرار دیا گیا ہے۔

آئی ایس پی آر کے مطابق کوئٹہ کے علاقے پنجپائی میں دہشت گردوں نے مرکزی شاہراہ پر ناکہ بندی کرکے آمدورفت متاثر کرنے کی کوشش کی، تاہم سکیورٹی فورسز نے کارروائی کرتے ہوئے اس کوشش کو ناکام بنا دیا۔ فائرنگ کے تبادلے میں پانچ مبینہ دہشت گرد ہلاک ہوگئے۔

بیان کے مطابق ضلع نوشکی میں ایک مشتبہ ٹھکانے کے خلاف کارروائی کے دوران فائرنگ کا تبادلہ ہوا، جس میں دو مبینہ دہشت گرد ہلاک ہوئے۔ کارروائی کے بعد ٹھکانے سے اسلحہ اور گولہ بارود بھی برآمد کیا گیا۔

اسی طرح خضدار میں انٹیلی جنس بنیادوں پر کیے گئے آپریشن کے دوران ایک مبینہ دہشت گرد ہلاک ہوا، جبکہ وہاں سے 490 کلوگرام دھماکا خیز مواد برآمد کیا گیا۔

آئی ایس پی آر کا کہنا ہے کہ تینوں علاقوں میں مزید مشتبہ عناصر کی موجودگی کے امکان کے پیش نظر سرچ اور کلیئرنس آپریشنز جاری ہیں۔ بیان میں مزید کہا گیا کہ نیشنل ایکشن پلان کے تحت وفاقی ایپکس کمیٹی سے منظور شدہ وژن ’’عزمِ استحکام‘‘ کے تحت دہشت گردی کے خاتمے کے لیے سکیورٹی فورسز اور قانون نافذ کرنے والے اداروں کی کارروائیاں جاری رہیں گی۔