بلوچستان میں لاپتہ افراد کی لاشیں برآمد، کوہلو میں دھماکے سے ایک شخص ہلاک، کچھی میں تھانے پر حملہ

کوئٹہ (نمائندگان ڈیلی اردو) پاکستان کے شورش زدہ صوبے بلوچستان کے ضلع خضدار سے 15 اپریل کو لاپتہ ہونے والے فاروق مینگل کی تشدد زدہ مسخ شدہ لاش برآمد ہوئی ہے، جبکہ گوادر کی تحصیل پسنی سے 12 اپریل کو لاپتہ ہونے والے نظام ولد محمود کی لاش بھی ملی ہے۔ دونوں واقعات نے لاپتہ افراد کے حوالے سے تشویش میں مزید اضافہ کر دیا ہے۔

کوہلو دھماکا

ادھر، بلوچستان کے ضلع کوہلو کی تحصیل کاہان کے علاقے پوڑھ میں بارودی سرنگ کے دھماکے کے نتیجے میں ایک شخص ہلاک ہو گیا۔

لیویز ذرائع کے مطابق ہلاک ہونے والے شخص کی شناخت شاہ بخش ولد ٹھیگیانی کے طور پر ہوئی ہے۔ واقعے کے بعد قانون نافذ کرنے والے ادارے اور امدادی ٹیمیں جائے وقوعہ پر پہنچ گئیں اور علاقے کو گھیرے میں لے کر تحقیقات شروع کر دی گئی ہیں۔

کچھی میں تھانے پر دستی بم حملہ

ضلع کچھی کے علاقے باغ میں نامعلوم افراد نے پولیس تھانے پر دستی بم حملہ کیا۔ ایس ایس پی کچھی رانا محمد دلاور کے مطابق حملہ آور دستی بم پھینکنے کے بعد موقع سے فرار ہو گئے۔ دھماکے میں کوئی جانی نقصان نہیں ہوا، تاہم ایک پولیس گاڑی کو جزوی نقصان پہنچا ہے۔ واقعے کے بعد علاقے کے داخلی و خارجی راستوں پر سیکیورٹی سخت کر دی گئی ہے۔