ترکی نے شام کی سرحد پر ڈرون مار گرایا، آپریشن میں 6 دہشتگرد ہلاک

انقرہ (ڈیلی اردو) ترکی نے اپنی فضائی حدود کی خلاف ورزی کرنے والے نامعلوم ڈرون کو شامی سرحد پر مار گرایا، ترک وزارت دفاع کا کہنا ہے کہ چھ مرتبہ خلاف ورزی پر ہمارے دو ایف 16 جنگی طیاروں نے انسیرلیک ایئر بیس سے پرواز بھری اور ڈرون کو مار گرایا جبکہ ترک سیکیورٹی فورسز نے مختلف علاقوں میں چھ دہشت گردوں کو ہلاک کردیا۔

تفصیلات کے مطابق ترکی وزارت دفاع نے بتایا کہ نامعلوم ڈرون نے 6 مرتبہ ترکی کی فضائی حدود کی خلاف ورزی کی تھی، اس ضمن میں مزید بتایا گیا کہ ہمارے دو ایف 16 جنگی طیاروں نے انسیرلیک ایئر بیس سے پرواز بھری اور ڈرون کو مار گرایا۔

ترک میڈیا کے مطابق ضلع قلیس کے مغربی ضلع فرات ڈھال میں ترک فضائیہ نے سرحدی حدود کی 6 بار خلاف ورزی کرنے پر ایک ڈرون مار گرایا جس کا ملبہ ترک حدود میں گرا۔

وزارت دفاع کی جانب سے بتایا گیا کہ ڈرون کی ملکیت کے بارے میں کچھ بھی کہنا قبل از وقت ہے اور ڈرون کو مقامی وقت کے مطابق دوپہر ڈیڑھ بجے نشانہ بنایا گیا۔

انہوں نے بتایا کہ شامی سرحد کے نزدیک ترک صوبے کیلس میں مار گرائے ڈرون کا ملبہ ملا۔

ادھر ترک کے ضلع سیرت کے علاقے پرواری میں ترک سیکیورٹی فورسز کی خصوصی ٹیم نے ایک آپریشن میں 5 دہشتگردوں کو ہلاک کردیا جبکہ ضلع ماردین میں بھی ترک سیکیورٹی فورسز نے ایک کارروائی کے دوران فرات شمدی عرف” راجر” نامی دہشت گرد کو ہلاک کردیا۔

واضح رہے کہ نومبر 2015 میں ترکی نے فضائی حدود کی خلاف ورزی پر شامی سرحد کے قریب روس کا ایک جنگی طیارہ مار گرایا تھا۔