جنوبی وزیرستان میں فائرنگ، نائب صوبیدار ہلاک

راولپنڈی (کاشف محمود) صوبہ خیبر پختونخوا کے قبائلی ضلع جنوبی وزیرستان کے علاقے کنی گرام میں دہشت گردوں سے فائرنگ کے تبادلے میں پاکستانی فوج کا اہلکار اور ایک دہشت گرد ہلاک ہوگیا ہے۔

پاکستانی فوج کے شعبہ تعلقات عامہ (آئی ایس پی آر) کے مطابق 17 اور 18 اگست کی رات پاک فوج نے دہشت گردوں کی نقل و حرکت دیکھی اور پھر ان کے خلاف کارروائی کی۔

آئی ایس پی آر کا کہنا ہے کہ کارروائی کے دوران ایک دہشت گرد ہلاک ہوگیا جب کہ فائرنگ کے تبادلے میں نائب صوبے دار سوہنے زئی بھی ہلاک ہوئے۔

آئی ایس پی آر کے مطابق نائب صوبیدار کا تعلق ڈیرہ اسماعیل خان سے تھا، دہشت گردوں کے خاتمے کے لیے علاقے میں سرچ آپریشن جاری ہے۔