خضدار: ماربل فیکٹری پر مسلح حملہ، مالک کے بیٹے سمیت 18 افراد اغوا، ایک مزدور زخمی

کوئٹہ(ڈیلی اردو) بلوچستان کے شورش زدہ ضلع خضدار کی تحصیل نال میں نامعلوم مسلح افراد نے ماربل کی کان اور فیکٹری پر حملہ کرکے 18 افراد کو اغوا کرلیا۔ مقامی میڈیا کی رپورٹس کے مطابق واقعہ خضدار شہر سے تقریباً 35 سے 40 کلومیٹر دور بیسار پہاڑی کے قریب پیش آیا، جہاں حملہ آور ہفتے کی شام گاڑیوں اور موٹر سائیکلوں پر پہنچے۔

پولیس کے مطابق اغوا کیے گئے افراد میں کان کے مالک کا بیٹا اور 17 مزدور شامل ہیں۔ بلوچستان کے مقامی ذرائع ابلاغ نے اطلاع دی ہے کہ حملے کے دوران ایک مزدور نے فرار ہونے کی کوشش کی تو اسے فائرنگ کرکے زخمی کردیا گیا۔ زخمی مزدور کی ٹانگ میں گولی لگی، تاہم اطلاعات کے مطابق اس کی حالت خطرے سے باہر بتائی گئی ہے۔

حکام کے مطابق مسلح افراد جاتے ہوئے فیکٹری سے دو گاڑیاں اور ایک لوڈر بھی اپنے ساتھ لے گئے۔ مغوی مزدوروں کا تعلق خضدار کے مختلف علاقوں سے بتایا جاتا ہے۔ تاحال کسی گروہ نے واقعے کی ذمہ داری قبول نہیں کی، جبکہ مغویوں کے بارے میں مزید تفصیلات اور ان کی بازیابی سے متعلق صورت حال کی آزادانہ تصدیق سامنے نہیں آئی۔

نال کے علاقے میں مزدوروں کے اغوا کا یہ پہلا واقعہ نہیں۔ اکتوبر 2025 میں بھی نامعلوم مسلح افراد نے ایک تعمیراتی کمپنی کے کیمپ پر حملہ کرکے 18 مزدوروں کو اغوا کیا تھا اور وہاں موجود گاڑیوں اور بھاری مشینری کو آگ لگا دی تھی۔ حالیہ واقعے نے ایک مرتبہ پھر بلوچستان میں کان کنی اور تعمیراتی منصوبوں سے وابستہ کارکنوں کی سلامتی کے حوالے سے تشویش بڑھا دی ہے۔