خیبرپختونخوا میں ٹی ٹی پی کے شدت پسندوں کے 410 کواڈکاپٹر حملے ریکارڈ، ترجمان پاک افواج

راولپنڈی (ڈیلی اردو) پاکستانی فوج کے شعبہ تعلقات عامہ (آئی ایس پی آر) کے سربراہ لیفٹیننٹ جنرل احمد شریف چوہدری نے پریس کانفرنس میں بتایا ہے کہ خیبرپختونخوا میں کالعدم تحریک طالبان پاکستان (ٹی ٹی پی) کے شدت پسندوں کی جانب سے 410 کواڈکاپٹر حملے ریکارڈ پر موجود ہیں، اور دہشت گردوں نے باقاعدہ اپنی کواڈکاپٹر وِنگ قائم کر رکھی ہے۔

ڈیلی اردو کے مطابق، لیفٹیننٹ جنرل احمد شریف چوہدری نے کہا کہ دہشت گردی کے خلاف جنگ بنیادی طور پر انٹیلی جنس پر  مبنی ہے جو تین مراحل پر مشتمل ہے۔

پاک افغان سرحد پر دہشت گردوں کو روکنا

چھوٹی دہشت گرد ٹیموں کی جانب سے حملوں کی کوششوں کو ناکام بنانا

ملک بھر میں انٹیلی جنس بیسڈ آپریشنز کے ذریعے دہشت گردوں کا خاتمہ

انہوں نے بتایا کہ دہشت گرد جب چیک پوسٹوں پر حملے کرتے ہیں تو کوئی کارندہ زندہ واپس نہیں جاتا۔ صرف اپریل 2025 میں سرحد پر 71 شدت پسند ہلاک کیے گئے، جن میں خارجی امجد مزاحم بھی شامل تھا، جو نورولی محسود کے بعد نمبر دو تھا۔

ڈی جی آئی ایس پی آر نے واضح کیا کہ یہ تاثر غلط ہے کہ پاک فوج ڈرون حملوں میں ملوث ہے۔ خیبرپختونخوا میں شدت پسندوں کی جانب سے 410 کواڈکاپٹر حملے ریکارڈ پر موجود ہیں، اور دہشت گردوں نے باقاعدہ اپنی کواڈکاپٹر وِنگ قائم کر رکھی ہے۔

ان کا کہنا تھا کہ شدت پسند مساجد اور عام شہریوں کے گھروں کو استعمال کرتے ہیں اور بچوں کو ڈھال بنا کر حملوں کی تیاری کرتے ہیں، جبکہ اس پر جان بوجھ کر خاموشی اختیار کی جاتی ہے۔

ڈی جی آئی ایس پی آر کے مطابق قانون نافذ کرنے والے ادارے ڈرون اور کواڈکاپٹرز صرف سرویلنس کے لیے استعمال کرتے ہیں اور انہیں صرف وہاں بروئے کار لایا جاتا ہے جہاں عام شہریوں کو نقصان کا اندیشہ نہ ہو۔ حال ہی میں خیبرپختونخوا پولیس کو بھی سرویلنس کے لیے کواڈکاپٹر فراہم کیے گئے ہیں۔

انہوں نے کہا کہ ٹی ٹی پی شدت پسندوں کی جانب سے کواڈکاپٹر استعمال کرنے کی ویڈیوز بھی موجود ہیں، جو ان کے جرائم کا واضح ثبوت ہیں۔

پاکستان میں کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے فوج اور سیکیورٹی فورسز اکثر اصطلاح "خوارج" استعمال کرتی ہیں۔