خیبر: سی ٹی ڈی کا جمرود میں پاک افغان سرحد کے قریب آپریشن، داعش کے 3 شدت پسند ہلاک

اسلام آباد (ش ح ط) کاونٹر ٹیررازم ڈیپارٹمنٹ (سی ٹی ڈی) خیبر پختونخوا نے پاک-افغان سرحد کے قریب جمرود میں کارروائی کے دوران 3 شدت پسندوں کو ہلاک کردیا۔

تفصیلات کے مطابق سی ٹی ڈی پشاور ریجن کے حکام کو ذرائع سے دہشت گردوں کے ایک منظم گروپ کی موجودگی کی اطلاع ملی جو پاک-افغان سرحد کے قریب جمرود کے علاقے میں دہشت گردی کا بڑا منصوبہ بنا رہے تھے۔

ترجمان کے مطابق جمرود میں کیے گئے آپریشن کے دوران سی ٹی ڈی اہلکاروں اور شدت پسندوں کے درمیان شدید فائرنگ کا تبادلہ ہوا۔

فائرنگ کے تبادلے میں تین شدت پسند مارے گئے جس کے قبضے سے 3 عدد کلاشنکوف، 12 عدد میگزین، 2 عدد ہینڈ گرنیڈ اور درجنوں گولیاں اور بارود برآمد کرلیا گیا ہے۔

آپریشن کے دوران ہلاک شدت پسندوں کی شناخت اکرام اللہ عرف محسن اور مرسلا خان عرف قاری عرف ارشاد نام سے ہوئی ہے جبکہ ایک شدت پسند کی شناخت کا عمل جاری ہے’۔

ہلاک شدت پسندوں کا تعلق داعش خراسان سے ہیں جبکہ تین سے چار دہشت گرد اندھیرے کا فائدہ اٹھاتے ہوئے فرار ہونے میں کامیاب ہوگئے۔

سی ٹی ڈی کی جانب سے فرار دہشت گردوں کی گرفتاری کے لیے علاقے میں سرچ آپریشن شروع کردیا گیا ہے۔