دو ایرانی جہازوں کو فائر کر کے ناکارہ بنا دیا، امریکی بحریہ

واشنگٹن (ڈیلی اردو/روئٹرز/اے پی/اے ایف پی) 

امریکی فوج نے کہا ہے کہ اس نے جمعے کے روز آبنائے ہرمز میں فائر کر کے دو ایرانی بحری جہازوں کو ناکارہ بنا دیا، جو امریکہ کی بحریہ کی طرف سے ناکہ بندی کی خلاف وزری کرتے ہوئے اس تنگ سمندری راستے سے گزرنا چاہتے تھے۔

واشنگٹن سے موصولہ رپورٹوں کے مطابق جمعہ آٹھ مئی کے روز ایرانی پرچم بردار دو بحری جہازوں نے خلیج فارس میں آبنائے ہرمز سے گزرنے اور امریکی ناکہ بندی کی خلاف ورزی کرنے کی کوشش کی، تو انہیں فضا سے حملہ کر کے ناکارہ بنا دیا گیا۔

امریکی فوج کی مرکزی کمان (سینٹ کام) کی طرف سے سوشل میڈیا پلیٹ  فارم ایکس پر شائع کردہ ایک پوسٹ میں کہا گیا، ’’ایران کے پرچم والے دو آئل ٹینکروں نے امریکی ناکہ بندی کی خلاف ورزی کرتے ہوئے جب آبنائے ہرمز کو پار کرنے کی کوشش کی، تو امریکی بحریہ کے ایک ایف اے اٹھارہ سپر ہارنیٹ جنگی طیارے نے فائر کر کے انہیں غیر فعال بنا دیا۔‘‘

ایکس پر اس پوسٹ کے ساتھ امریکی بحریہ نے ان دونوں ایرانی مال بردار بحری جہازوں پر کیے جانے والے فضائی حملوں کی ویڈیو فوٹیج بھی پوسٹ کی۔

تہران کا بھی وقفے وقفے سے جھڑپوں کا اعتراف

اسی دوران ایران نے بھی تصدیق کر دی ہے کہ اس کی فورسز کی آبنائے ہرمز کے سمندری علاقے میں امریکی فورسز کے ساتھ وقفے وقفے سے جھڑپیں ہو رہی ہیں۔

ایرانی نیوز ایجنسی فارس نے لکھا کہ ایران جنگ میں فائر بندی کے باوجود گزشتہ رات سے آبنائے ہرمز کے علاقے میں نئی جھڑپوں کے ساتھ جو کشیدگی دوبارہ بڑھ گئی تھی، اس کا سلسلہ آج جمعے کے دن بھی جاری رہا اور وقفے وقفے سے دونوں ممالک کی بحری افواج کے درمیان حملوں کا تبادلہ ہوتا رہا۔

فارس نیوز ایجنسی نے جمعے کی شام لکھا، ’’گزشتہ ایک گھنٹے کے دوران آبنائے ہرمز میں امریکی بحری جہازوں اور ایرانی مسلح افواج کے مابین بار بار حملوں کا تبادلہ ہوا ہے۔‘‘