راولپنڈی: سیکورٹی فورسز کی شمالی وزیرستان اور ٹانک میں کارروائیاں، دو دہشت گرد ہلاک، ایک گرفتار

راولپنڈی (کاشف محمود) صوبہ خیبر پختونخوا میں سیکیورٹی فورسز نے آپریشن کے دوران ایک دہشت گرد کو گرفتار کرلیا جبکہ فائرنگ کے تبادلے میں دو دہشت گرد مارے گئے۔

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے ضلع ٹانک میں دہشت گردوں کی موجودگی کے حوالے سے ایٹیلی جنس اطلاع کی بنیاد پر آپریشن کیا جس میں کالعدم تنظیم تحریک طالبان پاکستان کے دو دہشت گرد مارے گئے۔

مارے جانے والے دہشت گردوں کی شناخت شاہ زیب عرف ذاکر اور دانیال کے نام سے ہوئی ہے، دہشت گردوں کے پاس سے ہتھیار اور گولہ بارود بھی برآمد ہوا۔

آئی ایس پی آر کے مطابق یہ دہشت گرد سیکیورٹی فورسز کے خلاف دہشت گردانہ کارروائیوں، ٹارگٹ کلنگ اور اغوا برائے تاوان کی وارداتوں میں ملوث تھے۔

آئی ایس پی آر کے مطابق سیکیورٹی فورسز نے ایک اور کارروائی قبائلی ضلع شمالی وزیرستان کے علاقے میرعلی میں کی، جہاں دہشت گردوں کی اطلاع پر آپریشن کیا گیا، آپریشن کے دوران دہشت گردوں اور سیکیورٹی فورسز کے درمیان فائرنگ کا شدید تبادلہ ہوا، اس دوران ایک دہشت گرد کو ہتھیاروں اور گولیوں سمیت گرفتار کرلیا گیا۔

شمالی وزیرستان کے سب ڈویژن میرعلی کے علاقے کرکڑئی میں سیکیورٹی فورسز اور دہشت گردوں کے مابین جھڑپ، سیکیورٹی فورسز کے 4 اہلکار ہلاک، فائرنگ کا تبادلہ جاری ہے۔ ادھر شمالی وزیرستان کے علاقے خیسور میں کرفیو نافذ کرنے کی اطلاعات۔ #TTP #NorthWaziristan #Pakistan @Natsecjeff

— Shabbir Hussain Turi (@ShabbirTuri) December 30, 2021

آئی ایس پی آر کے مطابق فائرنگ کے شدید تبادلے میں چار اہلکار ہلاک ہوگئے، ہلاک ہونے والوں میں حوالدار منور، سپاہی ذکا اللہ، سپاہی فرحان اور سپاہی شیراز شامل ہیں۔