روس یوکرینی فوجیوں کی ہلاکت کیلئے نوجوان لڑکیاں بھرتی کر رہا ہے، یوکرین

کییف (ڈیلی اردو/نیوز ایجنسیاں) یوکرینی قومی پولیس کے سربراہ ایوان ویہیوسکی نے الزام عائد کیا ہے کہ روس یوکرینی فوجی اہلکاروں کی ہلاکت کے لیے کم عمر لڑکیوں کو بھرتی کر رہا ہے۔

ایک آن لائن یوکرینی میڈیا ادارے کو دیے گئے انٹرویو میں ایوان ویہیوسکی نے بتایا کہ رواں سال ٹیلیگرام کے ذریعے کرائے کے قتل کے چھ واقعات سامنے آئے، جن میں سے ایک کو سکیورٹی اداروں نے ناکام بنا دیا۔

انہوں نے کہا کہ یہ منصوبہ بند کارروائیاں تھیں جن کا انتظام ’’جارح ریاست‘‘ کی خفیہ ایجنسیوں نے کیا اور انہیں یوکرینی شہریوں کے ذریعے انجام دینے کی کوشش کی گئی۔

پولیس چیف کے مطابق حال ہی میں ایک 17 سالہ لڑکی کو ایک یوکرینی فوجی کی ہلاکت کے شبہے میں گرفتار کیا گیا ہے، جس کے بارے میں دعویٰ ہے کہ وہ ایک روسی ایجنٹ کی ہدایات پر عمل کر رہی تھی۔

ایوان ویہیوسکی نے کہا کہ روسی بھرتی کار میسجنگ پلیٹ فارمز کے ذریعے نوجوان خواتین تک رسائی حاصل کرتے ہیں، انہیں مالی لالچ دیتے ہیں اور پھر دور بیٹھ کر ان کی سرگرمیوں کی رہنمائی کرتے ہیں۔

روسی فیڈرل سکیورٹی سروس (ایف ایس بی) نے اس الزام پر فوری طور پر کوئی ردعمل نہیں دیا۔ 

دوسری جانب روسی سکیورٹی ادارے بھی یوکرین پر روس کے اندر دھماکوں کے لیے افراد بھرتی کرنے کے الزامات عائد کرتے رہے ہیں، جبکہ یوکرینی فوجی انٹیلی جنس ماضی میں کئی اعلیٰ روسی فوجی افسران کی ہلاکت کی ذمہ داری قبول کر چکی ہے۔