سکھر میں سی ٹی ڈی کی کارروائی، تحریک طالبان پاکستان کا مطلوب دہشت گرد گرفتار

سکھر (نمائندہ ڈیلی اردو) صوبہ سندھ کے ضلع سکھر میں سکھر شکارپور لنک روڈ پر سی ٹی ڈی اور پولیس نے مشترکہ طور پر کارروائی کی ہے جس میں دہشت گرد حسین بخش کو گرفتار کرلیا، دہشت گرد سے سے بارودی مواد، ڈیٹونیٹرز اور اسلحہ برآمدکرلیا گیا ہے۔

تفصیلات کے مطابق شکار پور سکھر لنک روڈ پر اسپورٹس کمپلیکس کے قریب پولیس مقابلہ ہوا، اس دوران سی ٹی ڈی اور پولیس نے بھرپور جوابی کارروائی کی اور کالعدم تنظیم ٹی ٹی پی کے دہشت گرد گرفتار کرلیا۔

ایس ایس پی کا کہنا ہے کہ کالعدم تنظیم تحریک طالبان پاکستان کا دہشتگرد گرفتار کرلیا ہے، گرفتار دہشت گرد سے بارودی مواد، ڈیٹونیٹرز اور اسلحہ بھی برآمد ہوا۔

ایس ایس پی کے مطابق گرفتار ملزم 2016 میں خانپور عیدگاہ میں خودکش دھماکے میں ملوث ہے، دھماکے میں 4 پولیس اہلکاروں سمیت 16 افراد زخمی ہوئے تھے۔

ملزم کی شناخت حسین بخش عرف ملا بخش بروہی کے نام سے ہوئی ہے۔ جبکہ پولیس نے گرفتار مبینہ دہشت گرد سے تفتیش شروع کردی ہے، ملزم کی مدد سے دیگر ملزمان کی گرفتاری بھی عمل میں لائی جاسکتی ہے۔