شام: درعا میں حزب اللہ سے منسلک مبینہ سیل کے تین ارکان گرفتار، راکٹ حملے کا منصوبہ ناکام

دمشق(ڈیلی اردو) شام کے جنوبی صوبے درعا میں سکیورٹی فورسز نے حزب اللہ سے منسلک ایک مبینہ سیل کے تین ارکان کو گرفتار کرکے راکٹ حملوں کی منصوبہ بندی ناکام بنانے کا دعویٰ کیا ہے۔ حکام کے مطابق کارروائی یرموک بیسن کے علاقے میں انٹیلی جنس معلومات کی بنیاد پر کی گئی۔

شامی جنرل انٹیلی جنس اور داخلی سکیورٹی فورسز کے مطابق گرفتار کیے گئے تین افراد مبینہ طور پر راکٹ لانچ کرنے کے لیے پلیٹ فارم تیار کر رہے تھے۔ سکیورٹی حکام کا کہنا ہے کہ کارروائی کے دوران لانچنگ پلیٹ فارمز کو مکمل طور پر ناکارہ بنا دیا گیا، جبکہ گرفتار افراد سے مزید تفتیش جاری ہے۔

حکام نے گرفتار افراد کی شناخت ابتدائی حروف ف۔ک، ز۔م اور ل۔ع کے نام سے ظاہر کی ہے۔ ان کے خلاف تحقیقات مکمل ہونے کے بعد انہیں متعلقہ عدالت میں پیش کیا جائے گا۔

شامی حکام نے اس کارروائی کو ممکنہ حملوں کی روک تھام کے لیے پیشگی سکیورٹی آپریشن قرار دیا ہے، تاہم مبینہ سیل کے ممکنہ اہداف کے بارے میں تفصیلات جاری نہیں کی گئیں۔ حزب اللہ کی جانب سے شامی حکام کے الزامات پر فوری طور پر کوئی ردعمل سامنے نہیں آیا۔

یہ کارروائی ایسے وقت میں سامنے آئی ہے جب شامی حکام اس سے قبل بھی ایران اور حزب اللہ سے منسلک مبینہ سرگرمیوں کے خلاف کارروائیوں کے اعلانات کرچکے ہیں۔ جولائی میں دمشق نے شام-عراق سرحد کے قریب ہتھیاروں کی ایک بڑی کھیپ پکڑنے کا دعویٰ بھی کیا تھا، جس کے بارے میں حکام کا کہنا تھا کہ اسے لبنان میں حزب اللہ تک پہنچایا جانا تھا۔