شام میں داعش کے زیرِ زمین اسلحہ ڈپو پر برطانوی اور فرانسیسی فضائی حملہ

لندن (ڈیلی اردو) برطانیہ کی وزارتِ دفاع کے مطابق رائل ایئر فورس کے ٹائیفون جنگی طیاروں نے فرانس کے جنگی طیاروں کے ساتھ مل کر شام میں داعش کے زیرِ زمین اسلحہ ڈپو کو نشانہ بنایا۔

وزارتِ دفاع کا کہنا ہے کہ خفیہ اطلاعات کے مطابق اس ٹھکانے میں بڑی مقدار میں ہتھیار اور بارودی مواد ذخیرہ کیا گیا تھا۔ برطانوی حکام کے مطابق طیاروں نے اس مرکز تک جانے والی متعدد سرنگوں کو نشانہ بنانے کے لیے پیووے IV گائیڈڈ بموں کا استعمال کیا۔ ابتدائی معلومات سے ظاہر ہوتا ہے کہ ہدف کو کامیابی سے نشانہ بنایا گیا ہے۔

مزید بتایا گیا کہ ہفتے کی رات گئے ہونے والی اس کارروائی میں کسی شہری کو نقصان نہیں پہنچا، جبکہ تمام طیارے بحفاظت اپنے اڈوں پر واپس لوٹ آئے۔

برطانوی وزیرِ دفاع جان ہیلی نے کہا،“یہ کارروائی برطانوی قیادت اور مشرقِ وسطیٰ میں داعش اور اس کے خطرناک و پرتشدد نظریات کے دوبارہ ابھرنے کو روکنے کے لیے اتحادیوں کے ساتھ کھڑے رہنے کے ہمارے عزم کی عکاسی کرتی ہے۔”

وزیرِ دفاع نے آپریشن میں حصہ لینے والی فورسز کی پیشہ ورانہ مہارت کو سراہتے ہوئے ان کا شکریہ ادا کیا۔

دوسری جانب اقوامِ متحدہ کے مطابق شام اور عراق میں اب بھی داعش کے 5,000 سے 7,000 جنگجو موجود ہیں۔