شمالی وزیرستان میں تحریک طالبان پاکستان کا ایک دہشت گرد ہلاک، دو گرفتار

راولپنڈی (کاشف محمود) صوبہ خیبر پختونخوا کے قبائلی ضلع شمالی وزیرستان کے ہیڈ کوارٹرز میرانشاہ میں سیکیورٹی فورسز کی کارروائی میں کالعدم ٹی ٹی پی کا ایک دہشت گرد ہلاک ہوگیا اور دو کو گرفتار کرلیا گیا۔

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان کے علاقے میران شاہ میں کالعدم تنظیم تحریک طالبان پاکستان (ٹی ٹی پی) کے دہشت گردوں کی اطلاع پر آپریشن کیا جس کے دوران ایک دہشت گرد ہلاک اور دو کو گرفتار کیا گیا۔

آئی ایس پی آر کے مطابق مارے گئے دہشت گرد کی شناخت زاہد عرف کوچی کے نام سے ہوئی جو ٹی ٹی ٹی پی کا آئی ای ڈی ماہر سمجھا جاتا ہے۔

ترجمان آئی ایس پی آر کا کہنا تھا کہ تینوں دہشت گرد غیر مقامی تھے جنہیں میران شاہ کے ایک گھر میں پناہ دی گئی تھی۔

آئی ایس پی آر کے مطابق دہشت گردوں کے قبضے سے اسلحہ اور گولہ بارود بھی برآمد ہوا جبکہ علاقے میں کسی دوسرے دہشت گرد کی تلاش کے لیے کلیئرنس آپریشن جاری ہے۔