ضلع کرم کو بھاری ہتھیاروں سے پاک کرنا ہوگا ، اس کے بغیر امن ممکن نہیں ، مشیر اطلاعات خیبرپختونخواہ

پشاور(ڈیلی اردو)‌ مشیر اطلاعات خیبر پختونخوا بیرسٹر محمد علی سیف نے کہا ہے کہ ضلع کرم کو بھاری ہتھیاروں سے پاک کرنا ہوگا ، بنکرز کی مسماری کے بغیر مستقل امن ممکن نہیں۔کرم گرینڈ جرگہ کے وفود سے بات چیت کرتے ہوئے مشیر اطلاعات خیبر پختونخوا بیرسٹر سیف کا کہنا تھا کہ بھاری ہتھیاروں کی واپسی پر تحفظات دور کرنے کی کوشش جاری ہے۔

انہوں نے کہا کہ ضلع میں امن بحالی کے لئے اینٹی ایئرکرافٹ ویپنز، میزائل اور آر پی جیز سے علاقے کو پاک کرنا ہوگا،مشیر اطلاعات خیبر پختونخوا کا مزید کہنا تھا کہ بنکرز کی مسماری کے بغیر علاقے میں مستقل امن ممکن نہیں، بھاری اسلحے کی حوالگی اور بنکرز کے خاتمے کے بغیر مرکزی شاہراہ نہیں کھولی جا سکتی۔

انہوں نے کہا کہ صوبائی حکومت لائف سیونگ ڈرگز اور اشیائے خوردونوش کی بلاتعطل فراہمی یقینی بنائے گی۔بیرسٹر سیف نے مزید کہا کہ آج بھی ہیلی کاپٹر کے ذریعے ادویات کی ایک بڑی کھیپ ضلع کرم پہنچائی گئی ہے۔