عمان کے ساحل کے قریب آئل ٹینکر پر ایران کا میزائل حملہ

تہران/مسقط (ڈیلی اردو) عمان کے ساحل کے قریب ایک آئل ٹینکر کو میزائل حملے میں نشانہ بنایا گیا، جس کے نتیجے میں جہاز میں آگ بھڑک اٹھی۔ ایرانی سرکاری نشریاتی ادارے آئی آر آئی بی (IRIB) نے دعویٰ کیا ہے کہ یہ حملہ ایرانی میزائلوں کے ذریعے کیا گیا۔

ایرانی میڈیا کے مطابق قطر کے آئل ٹینکر "الرقایات" نے امریکی بحریہ کی مدد سے آبنائے ہرمز میں عمانی راستے سے گزرنے کی کوشش کی، تاہم مبینہ طور پر متعدد انتباہات نظر انداز کرنے کے بعد اسے نشانہ بنایا گیا۔

دوسری جانب برطانوی میری ٹائم ٹریڈ آپریشنز (UKMTO) نے تصدیق کی ہے کہ اسے عمان کے شہر لیما کے مشرق میں تقریباً آٹھ بحری میل کے فاصلے پر ایک بحری واقعے کی اطلاع موصول ہوئی۔

UKMTO کے مطابق جنوب کی جانب سفر کرنے والے ایک آئل ٹینکر کو اس کے بائیں جانب سے ایک نامعلوم میزائل لگا، جس کے بعد جہاز میں آگ بھڑک اٹھی۔ ادارے کے مطابق واقعے میں کسی جانی نقصان یا ماحولیاتی آلودگی کی اطلاع نہیں ملی۔

برطانوی ادارے نے خطے میں موجود تمام تجارتی جہازوں کو احتیاط برتنے اور کسی بھی مشتبہ سرگرمی کی فوری اطلاع دینے کی ہدایت کی ہے۔

یہ واقعہ ایسے وقت پیش آیا ہے جب آبنائے ہرمز میں بحری آمدورفت اور سکیورٹی صورتحال پر شدید توجہ مرکوز ہے۔ شپنگ ڈیٹا کے مطابق جاپان سے منسلک 10 بحری جہازوں پر مشتمل ایک بیڑا حالیہ دنوں میں آبنائے ہرمز سے گزر رہا تھا، جس میں ایک بڑا آئل ٹینکر، کیمیائی مواد لے جانے والے دو ٹینکر، گاڑیاں منتقل کرنے والا جہاز اور ایک کنٹینر بردار جہاز شامل تھے۔

ایران نے آبنائے ہرمز میں جہازوں کی آمدورفت کے لیے اپنے قریب ایک مخصوص بحری راستہ مقرر کر رکھا ہے، جبکہ عمان نے بھی اپنے ساحل کے قریب ایک راستہ مختص کیا ہے۔

عمان کی جانب سے عارضی بحری راستہ قائم کرنے کے اعلان کے بعد ایران کے پاسداران انقلاب نے خبردار کیا تھا کہ ایرانی راستہ ہی محفوظ ہے اور قواعد کی خلاف ورزی کرنے والے جہازوں کے خلاف کارروائی کی جا سکتی ہے۔

تاہم، آئل ٹینکر پر حملے سے متعلق ایرانی دعوے کی آزادانہ طور پر تصدیق نہیں ہو سکی، جبکہ واقعے کی مزید تحقیقات جاری ہیں۔