غزہ میں اسرائیلی حملوں میں تین فلسطینی ہلاک

غزہ (ڈیلی اردو/روئٹرز )طبی حکام کے مطابق اتوار کے روز غزہ میں ہونے والے اسرائیلی حملوں میں پولیس فورس کے دو اہلکاروں سمیت تین فلسطینی ہلاک ہو گئے۔ 

غزہ میں اتوار کے روز اسرائیلی حملوں کے نتیجے میں کم از کم تین فلسطینی ہلاک ہوئے، جن میں حماس کے زیرِ انتظام پولیس فورس کے دو اہلکار بھی شامل ہیں۔ غزہ کے طبی حکام کے مطابق یہ حملے امریکہ کی ثالثی میں طے پانے والی جنگ بندی کی نازک صورتحال کو ظاہر کرتے ہیں۔

طبی عملے کے مطابق ایک فضائی حملے میں مغازی پناہ گزین کیمپ میں ایک شخص ہلاک ہوا، جبکہ دوسرے حملے میں خان یونس میں پولیس کے سربراہ وسام عبدالہادی اور ان کے معاون  ہلاک ہوئے۔ یہ معلومات غزہ کی حماس کے زیرِ انتظام وزارتِ داخلہ نے فراہم کیں۔

خبر رساں ادارے روئٹرز کے مطابق اسرائیل نے حالیہ عرصے میں غزہ میں حماس کے زیرِ انتظام پولیس  فورس پر حملے تیز کر دیے ہیں، جسے عسکریت پسند اپنے زیرِ کنٹرول علاقوں میں نظم و نسق بحال کرنے کے لیے استعمال کرتے رہے ہیں۔

اسرائیلی فوج نے ان واقعات پر فوری طور پر کوئی تبصرہ نہیں کیا۔

اکتوبر 2025 میں طے پانے والی جنگ بندی کے باوجود غزہ میں تشدد کا سلسلہ جاری ہے، جہاں اسرائیل تقریباً روزانہ حملے کر رہا ہے۔

مقامی طبی حکام کے مطابق جنگ بندی نافذ ہونے کے بعد سے اب تک کم از کم 850 فلسطینی  ہلاک ہو چکے ہیں، جبکہ اسرائیل  کا کہنا ہے کہ اسی عرصے میں شدت پسندوں نے اس کے چار فوجیوں کو ہلاک کیا۔

اسرائیل اور حماس ایک دوسرے پر جنگ بندی کی خلاف ورزیوں کے الزامات عائد کرتے رہے ہیں۔

غزہ کی وزارتِ صحت کے مطابق اکتوبر 2023 میں غزہ جنگ کے آغاز کے بعد سے اب تک 72 ہزار 500 سے زائد فلسطینی ہلاک ہو چکے ہیں، جن کی اکثریت عام شہریوں پر مشتمل ہے۔