غزہ پٹی میں اسرائیلی حملے، 30 سے زائد فلسطینی ہلاک، درجنوں زخمی

غزہ (ڈیلی اردو/نیوز ایجنسیاں) غزہ پٹی میں ہفتے کے روز ہونے والے اسرائیلی حملوں میں کم از کم 30 سے زائد فلسطینی ہلاک اور درجنوں زخمی ہو گئے۔

حملے شمالی اور جنوبی غزہ کے مختلف مقامات پر کیے گئے، جن میں غزہ سٹی کی ایک رہائشی عمارت اور خان یونس میں خیموں پر مشتمل ایک کیمپ بھی شامل ہے۔ ہلاک شدگان میں خواتین اور بچے بھی شامل ہیں۔

یہ پیش رفت ایسے وقت میں سامنے آئی ہے جب مصری سرحد پر واقع رفح کراسنگ کو کھولنے کی تیاری کی جا رہی ہے۔ اکتوبر میں طے پانے والے جنگ بندی معاہدے کے تحت ابتدائی طور پر رفح کراسنگ کو محدود پیمانے پر کھولا جانا ہے۔ اس مرحلے میں دیگر نکات میں حماس سمیت غزہ پٹی کو غیر مسلح کرنا اور نئی حکومت کی نگرانی میں تعمیر نو کی کارروائیاں شامل ہیں۔

فلسطینی وزارت صحت کے مطابق 10 اکتوبر سے شروع ہونے والی جنگ بندی کے بعد اب تک اسرائیلی حملوں میں 500 سے زائد فلسطینی ہلاک ہو چکے ہیں۔ تازہ حملوں کے نتیجے میں رہائشی اپارٹمنٹس، خیمے، پناہ گاہیں اور پولیس اسٹیشن نشانہ بنے، اور کئی افراد ملبے کے نیچے دبے ہوئے ہیں۔ 

غزہ پولیس کے جنرل ڈائریکٹوریٹ کے مطابق ایمبولینس اور ریسکیو ٹیمیں ہلاک شدگان اور زخمیوں کو نکالنے میں مصروف ہیں۔

اسرائیلی فوج کے ترجمان نے کہا کہ حملے حماس اور اسلامی جہاد کے چار کمانڈروں اور کارکنوں کو نشانہ بنانے کے لیے کیے گئے، اور وسطی غزہ میں ایک اسلحہ ڈپو، ہتھیاروں کی تیاری کی جگہ اور دو راکٹ لانچ کرنے والے ڈھانچے بھی تباہ کیے گئے۔

دوسری جانب حماس نے اسرائیلی دعووں کو مسترد کرتے ہوئے کہا کہ جنگ بندی معاہدے کی خلاف ورزی کے الزامات غلط ہیں اور ان کا مقصد شہریوں کے خلاف حملوں کو جواز فراہم کرنا ہے۔ حماس کے ترجمان حازم قاسم نے کہا کہ یہ الزامات فلسطینی عوام کے خلاف جرائم کو درست ثابت کرنے کی کوشش ہیں۔

غزہ میں رفح کراسنگ فلسطینیوں کے لیے انتہائی اہم ہے کیونکہ غزہ میں طبی سہولیات تباہ ہو چکی ہیں اور ہزاروں افراد کو علاج کے لیے باہر منتقل کرنے کی ضرورت ہے۔ تازہ حملے ظاہر کرتے ہیں کہ جنگ بندی ابھی کمزور بنیادوں پر قائم ہے اور متعدد مرتبہ خونریز واقعات رونما ہو چکے ہیں۔