لبنان میں جھڑپیں جاری، ایک اور اسرائیلی فوجی ہلاک

یروشلم (ڈیلی اردو) اسرائیلی فوج نے اعلان کیا ہے کہ جنوبی لبنان میں ہونے والی جھڑپوں کے دوران اس کا ایک اور فوجی ہلاک ہو گیا ہے۔

فوج کے مطابق ہلاک ہونے والے اہلکار کی شناخت سارجنٹ نیر بن اری کے نام سے ہوئی ہے، جو جنوبی لبنان میں ایک کارروائی کے دوران مارا گیا۔

اسرائیلی فوج کے مطابق یہ ہلاکت ایک روز بعد سامنے آئی ہے، جب حزب اللہ کے ساتھ جھڑپوں میں مزید چار اسرائیلی فوجی ہلاک جبکہ تین زخمی ہوئے تھے۔

امریکہ اور ایران کے درمیان جنگ کے خاتمے پر اتفاق کے بعد یہ اسرائیلی فوج کی جانب سے پانچویں فوجی کی ہلاکت کی اطلاع ہے۔

دوسری جانب لبنان میں حزب اللہ کے ساتھ جنگ بندی کے معاہدے کے چند گھنٹوں بعد بھی کشیدگی برقرار ہے۔ اطلاعات کے مطابق ہفتے کے روز اسرائیلی حملوں میں لبنان میں تقریباً 20 افراد ہلاک ہوئے۔

اسرائیل کا کہنا ہے کہ یہ حملے حزب اللہ کی جانب سے اسرائیلی افواج پر داغے گئے میزائلوں کے جواب میں کیے گئے، جبکہ حزب اللہ کی جانب سے فوری طور پر اس حوالے سے کوئی ردعمل سامنے نہیں آیا۔