لکی مروت میں گیس پائپ لائن اور پولیس اہلکاروں کے گھروں کو نشانہ، نوشہرہ میں بم دھماکہ

پشاور(ڈیلی اردو) خیبرپختونخوا کے مختلف اضلاع میں دہشتگردی کے بڑھتے واقعات نے عوام میں شدید خوف و ہراس پیدا کر دیا ہے۔ لکی مروت میں تھانہ لکی سٹی کی حدود بھانہ منجی والہ کے قریب نامعلوم افراد نے گیس پائپ لائن کو دھماکہ خیز مواد سے اڑا دیا، جس کی آواز دور دور تک سنائی دی اور پائپ لائن مکمل طور پر تباہ ہو گئی۔ پولیس فوراً موقع پر پہنچ کر شواہد اکٹھے کرتے ہوئے تحقیقات شروع کر دی۔ اسی دوران ضلع لکی مروت کے گاؤں جابوخیل میں سندھ پولیس میں تعینات انسپکٹر مثل خان کا گھر نذر آتش کر دیا گیا، جبکہ گاؤں شیری خیل میں پولیس اہلکار عصمت اللہ کا گھر بھی جلا دیا گیا۔ دونوں واقعات میں گھروں کا قیمتی سامان، موٹرسائیکل کے پرزے اور ایک کار جل کر خاکستر ہو گئی، جس سے لاکھوں روپے کا نقصان ہوا۔

ادھر نوشہرہ میں رسالپور مردان روڈ پر دیسی ساختہ بم کا دھماکہ ہوا، خوش قسمتی سے کوئی جانی نقصان نہیں ہوا۔ پولیس کے مطابق دھماکہ محدود نوعیت کا تھا اور بظاہر اس کا مقصد خوف و ہراس پھیلانا تھا۔ بم سڑک کے درمیانی حصے میں نصب کیا گیا تھا، جسے پھٹنے کے بعد بم ڈسپوزل اسکواڈ اور پولیس نے علاقے کو گھیرے میں لے کر سرچ آپریشن شروع کر دیا۔ حکام کا کہنا ہے کہ تمام واقعات کی تحقیقات جاری ہیں اور متاثرہ علاقوں میں سیکیورٹی مزید سخت کر دی گئی ہے۔