متحدہ عرب امارات پر ایران کے میزائل اور ڈرون حملے

ابوظہبی (ڈیلی اردو/روئٹرز) متحدہ عرب امارات کی وزارتِ دفاع نے کہا ہے کہ اس کے فضائی دفاعی نظام نے ایران کی جانب سے داغے گئے دو بیلسٹک میزائلوں اور تین ڈرونز کو ناکارہ بنا دیا ہے۔

وزارتِ دفاع کے مطابق یہ واقعہ جمعہ کے روز پیش آیا، جب دفاعی نظام نے بروقت کارروائی کرتے ہوئے تمام خطرات کو فضا میں ہی تباہ کر دیا۔

روئٹرز کے مطابق اس واقعے میں تین افراد معمولی زخمی ہوئے ہیں۔

اماراتی وزارتِ دفاع نے اپنے بیان میں کہا کہ وہ ہر قسم کے خطرات سے نمٹنے کے لیے مکمل طور پر تیار ہیں اور ریاست کی خودمختاری، سلامتی اور استحکام کے تحفظ کے لیے کسی بھی کوشش کا سخت جواب دیا جائے گا۔

اسی دوران خلیجی ریاست متحدہ عرب امارات کی جانب سے بتایا گیا ہے کہ ایران نے ایک بار پھر اس کے خلاف میزائل اور ڈرون حملے کیے، تاہم ابوظہبی کی جانب سے یہ واضح نہیں کیا گیا کہ آیا ان حملوں میں کوئی جانی یا مالی نقصان ہوا ہے۔

اماراتی حکام کے مطابق ان حملوں کا جواب دیا گیا ہے۔

دوسری جانب خطے میں کشیدگی کے باوجود سفارتی سطح پر امن کوششیں بھی جاری ہیں۔ 

امریکہ کی جانب سے نئی امن تجاویز پاکستان کے ذریعے ایران تک پہنچائی گئی ہیں، جبکہ ایرانی ردعمل کا انتظار کیا جا رہا ہے۔