مفتی منیر شاکر قتل کیس حل، دہشت گرد نیٹ ورک گرفتار

پشاور(ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) خیبر پختونخوا نے مختلف کامیاب کارروائیوں کے دوران دہشت گردی میں ملوث بڑے نیٹ ورکس کو بے نقاب کر دیا۔ ترجمان کے مطابق مفتی منیر شاکر قتل کیس حل کرتے ہوئے اس میں ملوث گروہ کی نشاندہی کی گئی، جبکہ پشاور میں دہشت گردی کے 18 سنگین واقعات میں ملوث ایف اے گروہ کو گرفتار کر لیا گیا، جن میں ڈی ایس پی سردار حسین خان سمیت 14 پولیس اہلکاروں کی ہلاکت کے واقعات بھی شامل ہیں۔

ترجمان نے بتایا کہ آپریشنز کے دوران بھاری مقدار میں اسلحہ، گولہ بارود اور بارودی مواد برآمد ہوا، جبکہ چھ حساس تنصیبات پر حملوں کی کوشش بروقت ناکام بنا دی گئی۔ سی ٹی ڈی نے مذہبی علما کے قتل میں ملوث عناصر کی نشاندہی اور داعش خراسان نیٹ ورک کا خاتمہ بھی کر دیا، جو 11 مئی کے پشاور خودکش حملے میں ملوث تھا۔

مزید بتایا گیا کہ سی ٹی ڈی نے اپنی آپریشنل صلاحیت بڑھانے کے لیے خصوصی یونٹس قائم کیے، اہلکاروں کے لیے بہتر سہولیات فراہم کیں اور جدید تربیتی پروگرامز کا آغاز کیا، جس سے دہشت گردی کے بدلتے خطرات سے نمٹنے اور پیچیدہ مقدمات کی مؤثر تفتیش ممکن ہو سکی۔