ٹانک میں دہشت گردوں نے سکول اور طبی مرکز بارودی مواد سے تباہ کر دیے

ٹانک (ڈیلی اردو) پاکستان کے شورش زدہ صوبہ خیبر پختونخوا کے ضلع ٹانک میں تعلیمی اور طبی مراکز ایک بار پھر دہشت گردوں کے نشانے پر آ گئے۔ 

پولیس کے مطابق تھانہ صدر کی حدود میں واقع گاؤں چیسن کچ میں گزشتہ شب نامعلوم دہشت گردوں نے گورنمنٹ مڈل سکول (بوائز) اور بنیادی صحت مرکز کو بارودی مواد سے اڑا دیا۔

پولیس کا کہنا ہے کہ دھماکوں کے نتیجے میں دونوں عمارتیں مکمل طور پر تباہ ہو گئیں، تاہم واقعے میں کوئی جانی نقصان نہیں ہوا۔

علاقہ مکینوں کے مطابق یہ اپنی نوعیت کا پہلا واقعہ نہیں، اس سے قبل بھی کئی سرکاری سکولوں اور طبی مراکز کو شرپسند عناصر نشانہ بنا چکے ہیں، جس کے باعث مقامی آبادی میں شدید خوف و ہراس پایا جاتا ہے۔

واقعے کے بعد سکیورٹی فورسز اور پولیس کی بھاری نفری جائے وقوعہ پر پہنچ گئی، علاقے کو گھیرے میں لے کر شواہد اکٹھے کیے گئے جبکہ سرچ آپریشن بھی شروع کر دیا گیا ہے۔