ٹانک میں سیکورٹی فورسز کا آپریشن، تحریک طالبان پاکستان کا خودکش بمبار مارا گیا

راولپنڈی (کاشف محمود) خیبر پختونخوا کے ضلع ٹانک میں سیکیورٹی فورسز کی کارروائی میں خودکش بمبار مارا گیا۔

پاکستانی فوج کے شعبہ تعلقاتِ عامہ (آئی ایس پی آر) نے بتایا ہے کہ ضلع ٹانک میں سیکیورٹی فورسز کی جانب سے آپریشن کیا گیا ہے جس میں ایک خودکش بمبار مارا گیا ہے۔

آئی ایس پی آر نے بتایا ہے کہ سیکیورٹی فورسز نے ٹانک کے قریب دیال روڈ پر انٹیلی جنس بنیاد پر آپریشن کیا ہے جس کے دوران ایک خود کش بمبار کو ہلاک کر دیا گیا ہے۔

پاک فوج کے شعبۂ تعلقاتِ عامہ کا مزید کہنا ہے کہ سیکیورٹی فورسز نے یہ آپریشن کالعدم تنظیم تحریک طالبان پاکستان (ٹی ٹی پی) کے دہشت گردوں کی موجودگی کی اطلاع پر کیا ہے۔

آئی ایس پی آر کا یہ بھی کہنا ہے کہ دہشت گردوں کے سرپرستوں اور کارندوں کے خاتمے کے لیے آپریشن جاری ہے۔

واضح رہے گزشتہ روز جنوبی وزیر ستان میں سیکیورٹی فورسز کے آپریشن کے دوران کالعدم تنظیم تحریک طالبان پاکستان کا دہشت گرد برقع پہن کر فرار ہونے کی کوشش کر رہا تھا کہ گرفتار کرلیا گیا جبکہ کارروائی میں اسلحہ، دھماکا خیز مواد اور مواصلاتی آلات بھی برآمد کیے گئے ہیں ۔