خیبر پختونخوا: ٹانک میں اکاؤنٹس دفتر پر دہشت گردوں کا حملہ، ایک پولیس اہلکار ہلاک، دوسرا زخمی

ٹانک (ڈیلی اردو) صوبہ خیبر پختونخوا کے ضلع ٹانک میں ڈسٹرکٹ اکاؤنٹس آفس وزیرستان پر دہشت گردوں کی جانب سے حملہ کیا گیا جس میں ایک پولیس اہلکار ہلاک جبکہ دوسرا زخمی ہو گیا۔

پولیس کے مطابق واقعہ ٹانک کے علاقہ وزیر آباد میں پیش آیا جہاں مسلح افراد دہشت گردوں نے ڈسٹرکٹ اکاؤنٹس آفس پر اچانک حملہ کردیا اس موقع پر موجود پولیس اہلکاروں نے فوری اور بروقت جوابی کارروائی کی۔

پولیس اور حملہ آوروں کے درمیان فائرنگ کے تبادلے میں ایک پولیس اہلکار ہلاک جبکہ دوسرا زخمی ہو گیا۔

واقعے کی اطلاع ملتے ہی پولیس کی بھاری نفری جائے وقع پر پہنچی، تاہم اس سے قبل موٹر سائیکل سوار حملہ آور اہلکار کو ٹارگٹ کرنے کے بعد فرار ہو چکے تھے۔

پولیس نے ڈسٹرکٹ اکاؤنٹس آفس جنوبی وزیرستان میں پوزیشن سنبھال کر علاقے کی ناکا بندی کردی۔

پولیس نے جائے وقوع سے شواہد اکٹھے کرنے کے بعد واقعے سے متعلق تحقیقات شروع کردی گئی ہیں۔

حملے میں ہلاک ہونے والے پولیس اہلکار کی شناخت ضیاء الرحمن کے نام سے ہوئی۔

ریسکیو نے لاش اور زخمی کو ڈی ایچ کیو ہسپتال منتقل کردیا۔